Chang va qum bo‘ronlari kabi xavfli tabiat hodisasi barcha qit’alardagi 151 mamlakatda kuzatilmoqda hamda bu 17 ta barqaror rivojlanish maqsadlaridan 11 tasiga erishishni xavf ostiga qo‘ymoqda.  

Birlashgan Millatlar Tashkilotining Oziq-ovqat va qishloq xo‘jaligi tashkiloti (FAO) tashkil etgan tadbir «Chang va qum bo‘ronlariga qarshi kurashda kuchlarni birlashtirish: birgalikda biz global javobga hissa qo‘shishimiz mumkin», deb nomlandi. Cho‘llanishga qarshi kurashish Konvensiyasining bajarilishini ko‘rib chiqish qo‘mitasi 21-sessiyasi (CRIC-21) doirasida o‘tkazilgan tadbir turli mamlakatlarning ushbu tabiiy hodisaga qarshi kurashish borasidagi sa’y-harakatlarini namoyish etish, milliy, mintaqaviy va mintaqalararo harakatlarga tayangan holda ushbu yo‘nalishdagi global choralarni targ‘ib qilish bo‘yicha fikr almashish imkonini berdi.

«Mamlakatlar o‘rtasida bilimlar almashishni qo‘llab-quvvatlash orqali biz chang va qum bo‘ronlarining oldini olish va yumshatish amaliyotini yaxshilashimiz, shuningdek, ushbu hodisaga qarshi kurashda siyosat izchilligi va sinergiyasini ta’minlashimiz mumkin», – dedi FAO texnik mutaxassisi Feras Ziadat.

Eslatib o‘tamiz, CRIC-21 2023-yil 13-17 noyabr kunlari Samarqandda 196 mamlakatdan  500 dan ortiq delegatlar ishtirokida bo‘lib o‘tmoqda.