Bugun, 27-noyabr kuni O‘zbekiston Respublikasi Bosh prokurori Nig‘matilla Yo‘ldoshev Piskent tumaniga tashrif buyurdi, deb xabar berdi Toshkent viloyati hokimligi axborot xizmati.

Tumanda kuz-qish mavsumiga hamda saylovlarga  tayyorgarlik jarayonlarini o‘rganish davomida Bosh prokurorga Piskent tumani hokimi Shuhrat Ahmedov, viloyat prokurori, hududiy sektorlar rahbarlari va tashkilot mutasaddilari hamrohlik qilishgan

Tashrif davomida «Do‘stlik» mahalla fuqarolar yig‘ini aholisining turmush sharoiti bilan yaqindan tanishdilar. Fuqarolarning suyultirilgan gaz, elektr energiyasi, ichki ko‘chalar ta’mirlanishi bilan bog‘liq murojaatlari joyida hal etildi. Muammolar yechimi bo‘yicha tegishli rahbarlarga vazifalar yuklatildi.

Shu kuni «Bo‘z» qishlog‘idagi ichki yo‘llar ham ta’mirlanib, serqatnov yo‘lning 400 metr qismi 300 metr/kub shag‘al bilan qoplandi. Shuningdek, «Do‘stlik» mahalla fuqarolar yig‘inidagi kam ta’minlangan oila vakillari holidan xabar olindi. Hudud aholisi ehtiyojiga ko‘ra ko‘mir va suyultirilgan gaz yetkazib berish choralari ko‘rildi.