2022-yildan bank kartasi sifatida foydalanish mumkin bo‘lgan elektron chipli maxsus pensiya kartasi joriy etiladi. Bu haqda Pensiya jamg‘armasi axborot xizmati ma’lum qildi.

Yangi Qaror loyihasiga ko‘ra:

2022-yil 1-apreldan boshlab pensiyalarni hisoblash fuqarolarning «Yagona mehnat milliy tizimi» idoralararo dasturiy-apparat kompleksiga kiritilgan mehnat staji, oliy o‘quv yurtlaridagi kunduzgi ta’lim va harbiy xizmat davri to‘g‘risidagi elektron ma’lumotlari asosida amalga oshiriladi.

Fuqarolarga davlat pensiyalarini tayinlash va to‘lashning avtomatlashtirilgan tizimini bosqichma-bosqich joriy etish, jumladan pensiyalarni tayinlash uchun faqat pasport yoki identifikatsiya ID-kartasi bilan murojaat qilish kifoya bo‘ladigan tizimni joriy etiladi.

2022-yil 1-yanvardan boshlab:

• Pensiya jamg‘armasi tomonidan moliyalashtiriladigan pensiya va nafaqalar to‘lash har uch yilda Qoraqalpog‘iston Respublikasi, viloyatlar va Toshkent shahri bo‘yicha alohida o‘tkaziladigan tender asosida tanlangan tijorat banki tomonidan amalga oshiriladi;
• pensiya va nafaqalar yetkazilgani uchun xizmat haqini to‘lash uchun fuqarolarning har oylik pensiya va nafaqa miqdoriga qo‘shimcha 1 foiz ustama joriy qilinadi hamda to‘lovlarni naqd pulsiz shaklda olish yoki arzonroq xizmatdan foydalanish hisobiga iqtisod qilingan mablag‘ pensiya va nafaqa oluvchining ixtiyorida qoldiriladi.