Telegramdagi «davletovuz» kanali o‘z surishtiruvlarini davom ettirib, Andijon va Jizzax ortidan Xorazmdagi holatni ochiqladi.

Xorazm viloyati hokimining sanoatni rivojlantirish, kapital qurilish, kommunikatsiyalar va kommunal xo‘jalik masalalari bo‘yicha o‘rinbosari Qurbanov Baxrom Sharipovich tayinlanganiga hali ko‘p bo‘lgani yo‘q. Bu lavozimda 2020 yilning martidan beri ishlab keladi. U viloyatda qurilish kompleksida pudrat, loyiha ishlariga bo‘lgan davlat buyurtmasini tender asosida joylashtirishni, shuningdek uning bajarilishi yuzasidan nazoratni ta’minlaydi.

Shu yilning 25 iyun kuni Qurbanov Baxrom Sharipovich raisligida Xorazm viloyati Urganch shahridagi perinatal markazini rekonstruksiya qilish bo‘yicha tender savdo komissiyasi majlisi bo‘lib o‘tadi. Komissiya qiymati 20 mlrd so‘mdan ortiq bo‘lgan inshootni qurish uchun «Bunyodkor» MChJni g‘olib sifatida tanlab oladi. Mazkur korxona ulushlari, yuridik shaxslar reyestriga ko‘ra, to‘lig‘icha Kurbanov Ulugbek Sharipovichga taalluqli. Bizdagi ma’lumotlarga ko‘ra, u viloyat hokimi o‘rinbosari, tender komissiyasi raisi Baxrom Qurbanovning yaqin qarindoshi — ukasi hisoblanadi.

Mazkur kompaniya, shuningdek, Urganch shahar Ashxobod mahalla fuqarolar yig‘inidagi ichimlik suv tizimlarini qurish va rekonstruksiya qilish bo‘yicha tenderda ham g‘olib bo‘lgan. Tender natijalari 2020 yil sentyabr oyida e’lon qilingan. Qariyb 7 mlrd so‘mlik ob’yekt bo‘yicha tender komissiyasi raisi Uy-joy va kommunal xo‘jalik vaziri bo‘lgan, lekin u yig‘ilishda «uzrli sabablarga ko‘ra qatnasha olmagan».

«Bizning-cha, nazorat organlari mazkur kompaniyaning Baxrom Qurbanovning eski lavozimlarda ishlagan paytida olgan buyurtmalarini ham o‘rganib ko‘rishi lozim», qayd etadi bloger.

P.S.: Davlat buyurtmalari, ta’bir joiz bo‘lsa, katta qozon. Undan barcha tadbirkorlar teng va to‘siqlarsiz foydalana olishi kerak. Shundagina rivojlanish bo‘ladi, shundagina raqobat muhiti qaror topadi. Modomiki davlat buyurtmalarini mansabdor shaxslarga taalluqli kompaniyalar olar ekan,  bu kompaniyalar qanchalik zo‘r va kuchli bo‘lmasin, oxir-oqibatda boshqa tadbirkorlik sub’yektlarining rivojlanishiga, ularning kengayshiga to‘sqinlik paydo bo‘ladi, bozorda bir tarafda mahalliy bozorni monopol qilgan, ikkinchi tarafdan esa chala, o‘g‘ri, otkat bilan ishlaydigan, faqat sifatsiz qurilish qiladigan kompaniyalarning kuni tug‘adi.

Shuning uchun madaniyatli jamiyatlarda bunday davlat buyurtmalarida chinovnikning korxonasi ishtirok etmaydi, hech qachon amaldor ukasi yoki akasi nomidagi kompaniya ishtirok etayotgan tenderda komissiya raisi bo‘lmaydi. Bu absurd. Bu jinoyat. Bu korrupsiya. Yuqoridagi holatlar, nazarimizda, manfaatlar to‘qnashuvi, qonun buzilishi joylarda chuqur ildiz otganini, muammoga tizimli yechimlar izlash kerakligini ko‘rsatmoqda.