O‘zbekiston Respublikasi Vazirlar Mahkamasining farmoyishlari asosida «O‘zbekneftgaz» aksiyadorlik jamiyatiga mamlakatimizning Ustyurt, Buxoro-Xiva, Farg‘ona, Hisor va Markaziy Qizilqum regionlarida geologiya-qidiruv ishlarini olib borish uchun neft va gazga doir istiqbolli bir qator konlar va maydonlar ajratilgan.

Mazkur qaror va farmoyishlar bilan «O‘zbekneftgaz» AJ oldiga 2020-2025 yillar mobaynida ushbu konlarda qidiruv bosqichini yakunlash hamda ajratilgan yangi maydonning neftgazlilik istiqbolini baholash orqali belgilangan uglevodorod hom-ashyo zahirasini o‘stirish topshirig‘i qo‘yilgan.

Mazkur topshiriq ijrosini ta’minlash maqsadida «O‘zbekneftgaz» AJ bo‘yicha uglevodorod xom-ashyo bazasini rivojlantirish va qayta hosil qilish bo‘yicha yillik ishlab chiqilgan Dasturlar asosida geologiya-qidiruv ishlari olib borilmoqda.

Geologiya-qidiruv ishlari yakunlangan konlar natijalari asosida ularning yakuniy zahiralarini baholash ishlari amalga oshiriladi.

«O‘zbekneftgaz» AJ Geologiya departamenti ma’lumotlariga ko‘ra, aksiyadorlik jamiyati tomonidan 2020-2022 yillar mobaynida yakuniy zahiralarni hisoblash bo‘yicha ishlab chiqilgan chora-tadbirlar asosida uglevodorod va foydali qazilmalar zahiralari bo‘yicha quyidagi konlar Davlat zahiralari komissiyasida tasdiqlandi.

• 2020 yilda «Chakkaqum-Shimoliy Suzma», «Murodtepa-Atamurod» konlari.

• 2021 yilda «Do‘ltatepa», «Marvarid», «Janubiy Kulbeshkak», «Uchtepa» konlari.

• 2022 yilda «To‘maris», «Arslon», «Sho‘rtak» konlari.

2023 yilda ham ushbu Dastur ijrosini ta’minlash maqsadida «O‘zbekneftgaz» AJ tomonidan chora-tadbirlar ishlab chiqilgan. Unga ko‘ra «Yormoq», «Andakli», «Shorqum», «O‘rtaqum», «Ijobat», «O‘rtabuloq» (ter.yura), «Chaqar» va «Tarnasoy» kabi konlarning yakuniy zahiralarni hisoblash belgilab olingan.

«O‘zbekneftgaz» AJ Matbuot xizmati