Toshkentda ovqatdan ommaviy zaharlanish bo‘lgani va u «Oqtepa lavash» umumiy ovqatlanish shoxobchalarida tayyorlangan tovuqli sendvichni iste’moli bilan bog‘langani haqida avval xabar qilingandi.

Bosh prokuratura mazkur holat yuzasidan ma’lumot berdi.

2019-yilning 4-7-iyun kunlari Toshkent shahrida istiqomat qiluvchi jami 49 nafar fuqarolar «ovqatdan toksikoinfeksiya» tashxisi bilan O‘zbekiston Respublikasi SSV EMYuKITI, 2 va 5-sonli yuqumli kasalliklar shifoxonalariga yotqizilgan.

Mazkur holat yuzasidan o‘tkazilgan tekshiruvda, ushbu fuqarolar shifoxonaga murojaat qilishidan avval Uchtepa tumani, Lutfiy ko‘chasi, Sergeli tumani, Yangi Qo‘yliq ko‘chasi, 7b-uy hamda Sergeli tumani, Yangi Sergeli ko‘chasi, 21-uyda joylashgan «Oqtepa lavash» («Grand Azia Plus» MChJ) umumovqatlanish tarmog‘ining uchta shoxobchalarida tez tayyorlanuvchi taomlarni («sendvich», «lavash» va «pitssa») iste’mol qilganliklari aniqlangan.

Mazkur holat yuzasidan 07.06.2019-yilda Toshkent shahar prokurori tomonidan «Grand Azia Plus» MChJ mansabdor shaxslari va boshqalarga nisbatan O‘zbekiston Respublikasi Jinoyat kodeksining 186-moddasi 4-qismi «b» bandi bilan jinoyat ishi qo‘zg‘atilgan.

Hozirda jinoyat ishi bo‘yicha Toshkent shahar prokuraturasi tomonidan tergov harakatlari olib borilmoqda, deyiladi xabarda.