Joriy yilning 31 yanvar kuni Yangihayot tumanida 12 yoshli qizning o‘limida ayblanib ushlangan shaxsning ishi yopiq sud majlisida ko‘riladi.

Oliy sud matbuot xizmati xabariga ko‘ra, jinoyat kodeksining 97-moddasi (qasddan odam o‘ldirish) 2-qismi «v», «j», «z», «o» bandlari, 104-moddasi (qasddan badanga og‘ir shikast yetkazish) 2-qismi «v» bandi, 118-moddasi (nomusga tegish) 4-qismi, 119-moddasi (jinsiy ehtiyojni zo‘rlik ishlatib g‘ayritabiiy usulda qondirish) 4-qismi, 134-moddasi (qabrni tahqirlash), 137-moddasi (odam o‘g‘rilash) 3-qismi «b» bandi va 226-moddasi (ma’muriy nazorat qoidalarini buzish) 1-qismida nazarda tutilgan jinoyatlarni sodir etganlikda ayblanayotgan A. T. (1993 yilda Toshkent viloyatida tug‘ilgan) ga oid jinoyat ishi jinoyat ishlari bo‘yicha Yakkasaroy tuman sudining ish yurituviga kelib tushdi.

Jinoyat-protsessual kodeksining 19-moddasi (sudda jinoyat ishlarining oshkora ko‘rilishi) talablariga muvofiq mazkur jinoyat ishi yopiq sud majlisida ko‘rib chiqilib, qo‘shimcha ma’lumot sud jarayoni yakuni bo‘yicha beriladi.

Avvalroq ish sudga oshirilgani xabar qilingandi.