«Mening fikrim» jamoaviy murojaatlar portalida fohishabozlikka qarshi qat’iy choralar ko‘rish va holat aybdorlariga qattiqroq jazo tayinlash taklif etilgan murojaat matni qo‘yildi. 

«Jamiyatda fohishalikni va shunga tenglashtiriluvchi buzuqlik holatlarini kamaytirish uchun faqatgina fohishalarga yoki ushbu sharoitni yaratib berayotgan shaxslarga jazo berilishi yetarli emas, balki shunda bevosita ishtirok etgan erkak yoki erkaklar uchun ham ma’muriy, jinoiy jazo choralari qo‘llanilsin, tegishli choralar ko‘rilsin» deyiladi murojaat matnida.

Shuningdek, qonunlarga tegishli o‘zgartishlar kiritilib, dalil bilan ushlangan mazkur holat ishtirokchisi uchun birinchi marta sodir etilsa, jarima belgilash, ikkinchi marta sodir etilsa, 15 sutka ma’muriy qamoq, uchinchi martada 1 yilgacha ahloq tuzatish ishlariga jalb qilish choralarini belgilashni taklif qilingan. 

Eslatib o‘tamiz, O‘zbekiston Respublikasining Ma’muriy javobgarlik to‘g‘risidagi kodeksning 190-moddasiga ko‘ra, fohishalik bilan shug‘ullish eng kam ish haqining uch baravaridan yetti baravarigacha miqdorda jarima solishga sabab bo‘ladi. Shunday huquqbuzarlik ma’muriy jazo chorasi qo‘llanilganidan keyin bir yil davomida takror sodir etilgan bo‘lsa, eng kam ish haqining yetti baravaridan o‘n baravarigacha miqdorda jarima solishga yoki o‘n besh sutkagacha muddatga ma’muriy qamoqqa olishga sabab bo‘ladi.