Davlat xavfsizlik xizmati Pokiston va Afg‘onistonda halok bo‘lgan ekstremistik g‘oya ta’siridagi oilaning yetim qolgan bolalarini O‘zbekistonga qaytardi. Bu haqda O‘zA yozmoqda.

Andijonda 1982-yil tug‘ilgan Farhod Hamroqulov ishlash uchun Rossiya Federatsiyasiga ketadi. Keyinroq u turmush o‘rtog‘i Ra’no Hamroqulova (1984-y.t.) va 3 nafar farzandini o‘z oldiga chaqirib oladi. Rossiyada ekstremistik g‘oyalar ta’siriga tushib qolgan Farhod Hamroqulov Ozarboyjon va Eron orqali Pokistonga boradi va «Turkiston islom harakati»ga qo‘shiladi.

2012-yilning avgust oyida Farhod Hamroqulov Pokiston hukumati qo‘shinlarining terrorchilarga qarshi o‘tkazgan harbiy amaliyoti natijasida halok bo‘ladi.

Uning o‘limidan so‘ng 3 nafar farzandi bilan beva qolgan Ra’no Hamroqulova 2013-yilda boshqa bir jangari bilan nikoh quradi. 2014-yilning kuzlarida ular Afg‘onistonga ko‘chib o‘tishadi va qizi Rayyona tug‘iladi. Ammo, 2018-yil Ra’no Hamroqulova sargardonlikda orttirgan og‘ir xastalikdan vafot etadi.

2018-yilning avgust oyida DXX ota-onasiz qolgan bolalarning 2 nafari — Osiyoxon (2009-y.t) va Rayyonalar (201-y.t) O‘zbekistonga olib kelib, bobosi va buvisi qaramog‘iga topshirgan.

May oyida Ra’no Hamroqulovaning onasi qolgan ikki nafar nabirasini ham qaytarish borasida DXXdan yordam so‘ragan. Kuni kecha Bibioysha (2003-y.t) va Sherzodbeklar (2005-y.t) ham yaqin qarindoshlari bag‘riga qaytarildi.

«Endi bu bolalar mamlakatimizda yashayotgan tengqurlari qatori zamonaviy maktablarda ta’lim olib, kelajakda vatan koriga yaraydigan shaxslar bo‘lib ulg‘ayadilar», – deyiladi xabarda.

30-may kuni O‘zbekistonning 156 nafar fuqarosi, asosan ayollar va bolalar Suriyadan Toshkent shahriga olib kelingan edi.