Antarktidaning Brant shelf muzligidan maydoni 1700 kvadrat kilometrga teng (qariyb ikkita Nyu-York kattaligida) aysberg ajralib chiqdi. Bu haqda NASA saytida xabar berildi.

«Brant muzligidagi sinish ikkita Nyu-York kattaligidagi aysbergni hosil qiladi. Bu holat kelgusida muzlikdagi ilmiy tadqiqotlarda va unda odamlar bo‘lishiga qanday ta’sir ko‘rsatishi noma’lum», — deyiladi NASA xabarida.

Muzlikda darz hosil bo‘lishi 2016-yilning oktyabrida «Landsat» yo‘ldoshidan olingan suratlarni solishtirish chog‘ida aniqlangandi. O‘sha paytdan beri yoriq sharq tomon tinmay chuqurlashib bordi. Oxirgi surat 2019-yilning 23-fevral kuni olingan. Uzilib chiqqan aysberg (1700 kv. km.), Antarktika mezonlari bilan o‘lchanganda, juda katta emas, hatto «katta yigirmatalik»ka ham kirmaydi.

Biroq tadqiqotchilar boshqa narsadan xavotirda: bu shu muzlikda joylashgan va yil davomida ishlovchi Britan antarktika xizmatiga qarashli Halli stansiyasining taqdiri. Stansiya muzlikdagi beqarorliklar sabab ilgari ikki marta yopilgan edi.