Ayni vaqtda, butun avtomobil bozori keng ko‘lamli geosiyosiy inqiroz tufayli zarar ko‘rmoqda. Yevropa kompaniyalari ehtiyot qismlar yetishmasligi tufayli ishlab chiqarishni to‘xtatayotgan bir paytda, AvtoVAZ bir qator ehtiyot qismlardan shunchaki voz kechishga qaror qildi.

Ukrainadagi vaziyat atrofidagi holat jahon avtomobil bozoridagi inqirozni kuchaytirishda davom etmoqda. Yevropa va Amerika brendlari mamlakatda ishlab chiqarilgan ehtiyot qismlarni yetkazib berish bilan bog‘liq muammolar tufayli ishlab chiqarishni to‘xtatmoqda. Pandemiyadan beri davom etayotgan yarimo‘tkazgichlar taqchilligi hamon to‘xtamadi.

Yetkazib berish zanjirlarining uzilishi va Rossiya Federatsiyasidagi yirik Yevropa va Amerika kompaniyalari ishining to‘xtatilishi fonida AvtoVAZ o‘ta og‘ir vaziyatdan chiqish yo‘lini topishga harakat qilmoqda. Bugungi standartlarga mos modellarni ishlab chiqarish uchun zarur bo‘lgan ko‘plab detallar bozorga chiqmasligini hisobga olib, kompaniya avtomobilni soddalashtirishni rejalashtirmoqda.

Bu haqda «Rossiya mashinasi» Telegram-kanali o‘z manbalariga tayanib xabar berdi. Ta’kidlanishicha, import qilinadigan qismlarni soddalashtirish va mahalliy qismlarga almashtirish Lada Vesta, Granta, Niva Travel va Legend modellariga ta’sir qiladi.

Ehtimolga ko‘ra, modellardan ABS va ESP yo‘qoladi — tormozlash paytida g‘ildiraklarning qulflanishiga to‘sqinlik qiladigan tizim va barqarorlikni elektron nazorat qilish, shuningdek, xavfsizlik yostiqchalari va ERA-GLONASS kompleksi bo‘lmasligi mumkin.

Norasmiy ma’lumotlarga ko‘ra, avtomatik boshqaruv bloki soddalashtiriladi, uning dasturiy ta’minoti, eko-klassi ham kamayadi. «Rossiya mashinasi», shuningdek, Rossiya Federatsiyasi Sanoat va savdo vazirligi barqaror ishlab chiqarish uchun mahalliy avtomobillarning dizaynidagi har qanday oqilona o‘zgarishlarni qonuniylashtirish uchun kafolatlar berganligini ham aniqladi.

Voqealarning xuddi shunday rivojlanishini Avtostat tahliliy agentligi ijrochi direktori Sergey Udalov «Kommersant»ga bergan intervyusida oldindan bashorat qilgan edi. U ABS va boshqa «xizmat ko‘rsatish» opsiyalari avtomobillardan yo‘qolishi mumkinligini aytgandi. Istisno tariqasida, ekspertning fikriga ko‘ra, Rossiyada ishlab chiqariladigan avtomobillarda konditsioner bo‘lishi mumkin.

Tabiiyki, zamonaviy qulaylik standartlariga javob beradigan avtomobillarga o‘rganib qolgan rus xaridorlari bunday yangilikdan mamnun bo‘lishlari dargumon. Biroq, inqirozning davom etishini hisobga olgan holda, ularning tanlovini keng deb atash ham mumkin emas.

Hozirgi sharoitda UzAuto Motors kompaniyasining budjetli Chevrolet modellari o‘ziga xos «lyuks»ga aylanishi mumkin. Rossiya Federatsiyasidagi inqirozdan pul ishlab qolishga intilayotgan «tadbirkorlar»dan iborat navbatlar allaqachon mashinalar ortida joylashib ulgurgan. Kompaniya bunday «ishbilarmonlar» buyurtmalarini oddiy mijozlarga qaraganda ancha uzoq kutishlariga to‘g‘ri kelishidan allaqachon ogohlantirgan. UzAuto Motors uchun mijozlarga xizmat ko‘rsatish ustuvor vazifa hisoblanadi.