Айни вақтда, бутун автомобил бозори кенг кўламли геосиёсий инқироз туфайли зарар кўрмоқда. Европа компаниялари эҳтиёт қисмлар етишмаслиги туфайли ишлаб чиқаришни тўхтатаётган бир пайтда, АвтоВАЗ бир қатор эҳтиёт қисмлардан шунчаки воз кечишга қарор қилди.

Украинадаги вазият атрофидаги ҳолат жаҳон автомобил бозоридаги инқирозни кучайтиришда давом этмоқда. Европа ва Америка брендлари мамлакатда ишлаб чиқарилган эҳтиёт қисмларни етказиб бериш билан боғлиқ муаммолар туфайли ишлаб чиқаришни тўхтатмоқда. Пандемиядан бери давом этаётган яримўтказгичлар тақчиллиги ҳамон тўхтамади.

Етказиб бериш занжирларининг узилиши ва Россия Федерациясидаги йирик Европа ва Америка компаниялари ишининг тўхтатилиши фонида АвтоВАЗ ўта оғир вазиятдан чиқиш йўлини топишга ҳаракат қилмоқда. Бугунги стандартларга мос моделларни ишлаб чиқариш учун зарур бўлган кўплаб деталлар бозорга чиқмаслигини ҳисобга олиб, компания автомобилни соддалаштиришни режалаштирмоқда.

Бу ҳақда «Россия машинаси» Телеграм-канали ўз манбаларига таяниб хабар берди. Таъкидланишича, импорт қилинадиган қисмларни соддалаштириш ва маҳаллий қисмларга алмаштириш Lada Vesta, Granta, Niva Travel va Legend моделларига таъсир қилади.

Эҳтимолга кўра, моделлардан ABS ва ESP йўқолади — тормозлаш пайтида ғилдиракларнинг қулфланишига тўсқинлик қиладиган тизим ва барқарорликни электрон назорат қилиш, шунингдек, хавфсизлик ёстиқчалари ва ERA-GLONASS комплекси бўлмаслиги мумкин.

Норасмий маълумотларга кўра, автоматик бошқарув блоки соддалаштирилади, унинг дастурий таъминоти, эко-класси ҳам камаяди. «Россия машинаси», шунингдек, Россия Федерацияси Саноат ва савдо вазирлиги барқарор ишлаб чиқариш учун маҳаллий автомобилларнинг дизайнидаги ҳар қандай оқилона ўзгаришларни қонунийлаштириш учун кафолатлар берганлигини ҳам аниқлади.

Воқеаларнинг худди шундай ривожланишини Автостат таҳлилий агентлиги ижрочи директори Сергей Удалов «Коммерсант»га берган интервюсида олдиндан башорат қилган эди. У ABS ва бошқа «хизмат кўрсатиш» опциялари автомобиллардан йўқолиши мумкинлигини айтганди. Истисно тариқасида, экспертнинг фикрига кўра, Россияда ишлаб чиқариладиган автомобилларда кондиционер бўлиши мумкин.

Табиийки, замонавий қулайлик стандартларига жавоб берадиган автомобилларга ўрганиб қолган рус харидорлари бундай янгиликдан мамнун бўлишлари даргумон. Бироқ, инқирознинг давом этишини ҳисобга олган ҳолда, уларнинг танловини кенг деб аташ ҳам мумкин эмас.

Ҳозирги шароитда UzAuto Motors компаниясининг бюджетли Chevrolet моделлари ўзига хос «люкс»га айланиши мумкин. Россия Федерациясидаги инқироздан пул ишлаб қолишга интилаётган «тадбиркорлар»дан иборат навбатлар аллақачон машиналар ортида жойлашиб улгурган. Компания бундай «ишбилармонлар» буюртмаларини оддий мижозларга қараганда анча узоқ кутишларига тўғри келишидан аллақачон огоҳлантирган. UzAuto Motors учун мижозларга хизмат кўрсатиш устувор вазифа ҳисобланади.