Халқ таълими вазирлиги томонидан 16 ёшга тўлган мактаб битирувчилари 2022-2023 ўқув йили олий таълим муассасаларига кириш тест синовларида иштирок этиш учун ўз вақтида фуқаролик паспорти, яъни ID-карта олишлари лозимлиги ҳақида маълум қилган эди. Бу эса айрим абитуриентларда турли саволларни келтириб чиқармоқда.

Давлат тест марказининг маълум қилишича:

• жорий йилда ҳам олий таълим муассасаларининг бакалавриат таълим йўналишларига кириш тест синовлари учун абитуриентларни онлайн рўйхатга олиш my.dtm.uz сайти орқали онлайн тарзда амалга оширилади;
• рўйхатга олишда абитуриентларнинг расми ва паспорт маълумотлари Давлат персоналлаштириш марказидан онлайн режимда олинади;
• бунинг учун абитуриентда биометрик паспорт ёки ID-карта бўлиши лозим;
• биометрик паспортга эга бўлган абитуриентлар ID-карта олишлари шарт эмас.

Абитуриентлар биометрик паспорт билан ҳам my.dtm.uz сайти орқали онлайн рўйхатдан ўтишлари мумкин.

Эслатби ўтамиз, апрель ойи охирида тест топшириқлари сони ва баҳолаш мезонлари аниқ бўлган эди.