20 февраль куни Муҳаммад ал-Хоразмий номидаги Тошкент ахборот технологиялари университетида АҚШнинг «Webster» университети вице-президенти Джон Пайл, ТАТУ раҳбарияти ҳамда ТАТУда АҚШнинг «Webster» университети «Бизнес бошқаруви (MBA)» магистратура йўналишига ўқишга ҳужжат топширган талабалар ўртасида учрашув ташкил этилди.

Вице-президент ТАТУда АҚШнинг «Webster» университети «Бизнес бошқаруви (MBA)» магистратура йўналишига ўқишга қабул қилиш жараёни билан танишди, ҳужжат топшираётган талабалар билан таълим жараёни ҳақида суҳбатлашиб олди.

Бундан ташқари, Тошкент шаҳрида АҚШнинг «Webster» университети филиалини ташкил этиш ва 2019/2020 ўқув йилидан бошлаб абитуриентларни қабул қилинишини йўлга қўйиш масалаларини муҳокама этди.

Маълумот ўрнида: Тошкент ахборот технологиялари университети билан ҳамкорликда фаолият бошлаган АҚШнинг Вебстер университети (Webster University, George Herbert Walker School of Business and Technology) Master of Business Administration (MBA: Бизнес бошқаруви магистратура йўналиши) ўқув дастури асосида «Лойиҳаларни бошқариш» йўналишига талабаларни қабул қилиш жараёни бошланган ва ўқишга қабул қилиш давом этмоқда.