Бразилиялик футбол юлдузи Неймар орадан 12 йил ўтиб қадрдон «Сантос» клубига қайтганидан сўнг илк голини урди.

У Campeonato Paulista (Сан-Паулу штати чемпионати) илк ўйинида «Агуа Санта»га қарши тўп сурди. Жамоаси 3:1 ҳисобида ғалаба қозонган ўйинда Неймар 14-дақиқада пеналтидан гол киритди, қолаверса, битта голли узатма муаллифи бўлди.

Неймар — «Сантос» академияси тарбияланувчиси, 2009–2013 йилларда жамоа асосий таркибида порлаган ва Европа грандларининг назарига тушган.

Эслатиб ўтамиз, 28 январ куни Саудиянинг «Ал-Ҳилол» клуби Неймар билан шартномасини бекор қилганди.

Неймарни «Ал-Ҳилол» Франциянинг «Пари Сен-Жермен» клубидан 2023 йил ёзида 90 млн еврога сотиб олган. У янги жамоасида бор-йўғи беш ўйин ўтказиб, биттагина гол ура олди. Чунки ўша йил кузида Бразилия сафида Уругвайга қарши ўйинда жароҳат олиб, қарийб бир йилга сафдан чиқди.

Неймар энг яхши ўйинларини «Барселона»да (2013–2017)да ўтказган. Каталонияликлар сафида икки марта Испания чемпиони (2014/15, 2015/16), уч карра Испания кубогини қўлга киритган. 2014/15 мавсумида жамоаси билан Европа Чемпонлар лигаси ғолиби бўлган.