Италиянинг «Рома» клуби мавсум олди тайёргарлик учрашувида Испаниянинг «Бетис» жамоасига қарши баҳс олиб борди.

Учрашувнинг 4-дақиқасида мезбонлар футболчиси Родри Санчес «Бетис»ни ҳисобда олдинга олиб чиқди.

Баҳснинг 27-дақиқасида Элдор Шомуродов ўзининг дебют учрашувидаёқ рақиб дарвозасига чиройли гол киритди.

Орадан кўп ўтмай Набиль Фекир «Бетис»нинг навбатдаги голини йўллади.

Иккинчи бўлим бошида римликлар бурчак тўпидан кейин мувозанатни тиклашди. Узатилган тўпга Шомуродов ҳаммадан биринчи сакраб боши билан зарба берди. Зарбасидан дарвоза тўсинига тегиб қайтган тўпни Жанлука Манчини бўш дарвозага жойлаб қўйди.

Бироз вақт ўтиб майдонда кам кузатиладиган ҳолат рўй берди. Кетма-кет «Рома»нинг уч вакили қизил карточка олиб, майдондан ҳайдалди. Орада римликлар устози Жозе Моуриньога ҳам қизил карточка берилди.

Шомуродов 67-дақиқада захирага олинди, унинг ўрнига мажбурий тарзда ҳимоячи туширилди. Камчилик бўлиб қолган римликлар дарвозаси эса кетма-кет нишонга олинди ва «Рома» йирик ҳисобда мағлуб бўлди.

«Бетис» Испания — «Рома» Италия 5:2

Голлар: 1:0 – 4 Родри, 1:1 – 27 Шомуродов, 2:1 – 30 Фекир, 2:2 – 51 Манчини, 3:2 – 58 Морено, 4:2 – 80 Телё, 5:2 – 83 Гонсалес.

«Бетис»: Руй Сильва, Морено, Руис, Сабали (Монтойя, 17), Эдгар Гонсалес, Родри (Вильям Карвалью, 72), Каналес (Гуардадо, 52), Руибаль (Хоакин, 73), Акуоку (Гонсалес, 72), Фекир, Иглесиас (Телё, 73).

«Рома»: Руй Патрисиу (Фузато, 70), Манчини, Смоллинг (Рожер, 46), Калафёри, Карсдорп, Пеллегрини, Диавара (Верету, 46), Мхитарян (аш-Шаарави, 46), Кристанте (Бове, 46), Заниоло (Карлес Перес, 63), Шомуродов (Кумбула, 67).

Огоҳлантиришлар: Карсдорп (12), Пеллегрини (37), Мхитарян (41), Заниоло (53), Манчини (58).

Четлатишлар: Пеллегрини (59), Манчини (65), Карсдорп (78).