«Франc 24» телеканали журналисти ва террорлог Вассим Наср Сурия ҳудудининг ИШИД террорчиларидан тозалангани ҳали ташкилот бутунлай йўқ қилиб юборилганини англатмаслигини айтди. Бу ҳақда Франциянинг «Europe1» радиоси хабар берди.

Куни кеча Франция президенти Эммануэл Макрон «Франc 24» телеканалига берган интервюсида Суриядаги уруш феврал ойининг ўрталарига бориб ниҳоясига етишини айтиб ўтган, бир неча кун олдин эса Ироқ бош вазири мамлакат ҳудуди террорчилардан тозаланганини эълон қилган эди. Лекин Насрнинг фикрига кўра Сурия ҳудудида ташкилот устидан қозонилган ғалаба, ташкилотнинг тугатилганини англатмайди. «Уруш узоқ давом этиши мумкин бўлган янги босқичга ўтиши мумкин» дея Ироқда содир бўлаётган бугунги воқеаларни мисол қилиб келтирди у.

«Ироқда ИШИД устидан ғалаба қозонилгани айтилган бўлсада, ташкилот аъзолари ҳамон бу давлатда қолмоқда. Бугун улар Мўсулнинг жанубида портлаш содир этишди, шунингдек Бағдод шимолида ҳам портлаш содир бўлди. Бу ҳол Сурияда ҳам давом этиши мумкин, улар партизанлик урушига ўтиб олишлари эҳтимоли бор. Бу эса вазиятни мураккаблаштиради. Ғарб давлатларидаги ички террористик хавфи ҳақида гапирмаса ҳам бўлади. Чунки, ташкилот у ерлардаги кишиларни ўзининг номидан ҳаракатланишга мажбурлаб келади» деган эксперт.