АҚШ президенти Дональд Трамп ўзининг Украина ва Россия бўйича махсус вакили Кит Келлогни урушни тўхтатиш бўйича музокаралардан четлатди. 

NBC манбаларига кўра, бунга Кремлнинг сўрови сабаб бўлган. Президент Владимир Путинга Кит Келлогнинг «украинпараст кайфиятда» экани маъқул келмаган.

«Келлог – собиқ америкалик генерал, Украинага ўта яқин. У бизбоп тоифадаги, бизга маъқул «калибр»даги одам эмас», – деган россиялик амалдор NBC мухбирига.

АҚШ президентининг Украина ва Россия бўйича махсус вакили Келлог яқинда Саудия Арабистонида ташкил этилган Россия ва Украина делегацияси билан учрашувларда қатнашмаган. Ҳолбуки, мазкур икки давлат билан муносабатлар унинг асосий ваколат доирасига киради.

Кеча, 13 март куни Трампнинг Яқин Шарқ бўйича махсус вакили Стив Уиткофф Москвага келиб Путин билан учрашган.

Аввал хабар берганимиздек, Саудия Арабистонида кечган АҚШ расмийлари билан музокаралар якунида Украина ҳарбий ҳаракатларда 30 кунлик танаффусга розилик билдирганди.

30 кунлик танаффус ташаббусига муносабат билдирган Путин Москва Киев билан оташкесим ўрнатиш тарафдори экани, аммо бунинг муайян нозик жиҳатлари борлигини урғулаган ва якуний позициясини билдиришдан тийилган.

Москвада Путин билан учрашган Стив Уиткофф бу борада Россия раҳбариятининг аниқ фикрларини тинглаган. Ҳозирча музокара тафсилотлари очиқланмади. DW хабарига кўра, Вашингтон Россия ва Украина урушини тўхтатиш истиқболига «эҳтиёткор оптимизм» билан қарамоқда.

Украина президенти Владимир Зеленский эса Путинни манипуляцияда айблаган.

«У (30 кунлик танаффус ташаббусига) рад жавобини ҳозирламоқда. Путин албатта Трампга урушни давом эттириш ва украиналикларни ўлдириш ниятида эканини айтишдан қўрқади. Шу боис москвадагилар ташаффус ғоясига шундай шартларни илгари суришмоқчики, токи у ёки умуман амалга ошмасин, ёки уни рўёбга чиқариш ортга сурилсин», – деган Украина раҳбари.