Тошкент шаҳрида мудҳиш воқеа содир бўлди. Оилавий муаммо сабаб ота ўғлининг қотилига айланди. Иш икки йил ўтиб очилди ва қотилга ҳукм ўқилади. Бу ҳақда Олий суд бош консультанти Акром Ариповнинг мақоласида сўз боради.

2018 йил 27 август. Ичиб олган Мирпўлат (исмлар ўзгартирилган) уйга келиб уйқуга кетади. Ишдан келган ота эса унинг ётишини кўриб ғашланади.

Ота уни судраганча ҳовлига олиб чиқади. Чиндан ҳам кўп ичганиданми, бола шунда ҳам уйғонмайди. Ота ҳовлида ётган кетмон дастасини олиб унинг тўғри келган жойларига бор важоҳати, кучи билан ура кетади. Салгина ингроқ товушини эшитиб, жаҳлдан тушиш, бироз ўзига келиш учун ҳаммомга кирган Мираҳмад юз-қўлини ювиб чиқади. Бироқ, қаршисида ётган боласи эмас, юз йиллик душманидек яна кўзига важоҳат тўлади ва бошқа бир кетмон дастасини олиб қилмишини давом эттиради. Чарчаб, ҳолдан тойгунча, балки хумордан чиққунича дўппослаб уйига кириб кетади. Бу пайтда Мирпўлат қонга ботиб борарди.

28 август тонгида ота ўғлининг қўлларини келиб ушлади. У боласини ўлдириб қўйганди.

Йигирма ёшга тўлган навқирон йигит шу тариқа жувонмарг бўлганди.

Мираҳмад мурдани йўқотишга аҳд қилади ва уйининг ертўласига икки соатлар мобайнида чуқур ковлаб битиради. Ўзи ётган уйнинг деворига қоқилган қизил духобани олиб чиқиб майитни ўраркан, уни ертўлага судраб кириб кўмиб ташлайди.

Орадан бир-бир ярим ой ўтаркан, ертўладан келаётган бадбўй ҳид ҳовлини тута бошлайди. Бу эшикдан кирган ҳар қандай кишини шубҳага солиши мумкинлигини ўйлаган Мираҳмад яна бир ишни режа қилади. У ертўлани қалин қилиб цементлаб икки кун электр печи билан қуритади ва уйида боқаётган қуёнларини шу ерга олиб келиб қамайди.

Бу оилада турмушга чиқиб кетган қиз ҳам бор эди. У ИИБга бориб, акасининг йўқолганлиги, отасидан шубҳаси борлиги ҳақида ариза қилади.

Мираҳмадни ИИБга чақиришади. Ўша куни 2019 йил октябрь ойининг ўрталари эди. Мираҳмад ертўладаги цементни кўчириб у ердан ўғлининг жасадини кавлаб олади. Ўралган духоба аллақачон чириб кетган, майит ҳам бир аҳволда бўлгани боис қисилиб қолган оёқларининг тўпиғидан пасти узилиб тушиб қолади. Мурдани томга олиб чиқиб яширган ота ертўлани текислаётиб узилиб қолган бармоқ, суякларни кўриб қолади ва уларни ҳам бир целлофан халтага солиб чиқади.

Селофандаги бўлакларни кўчага, чиқинди ташланадиган жойга олиб бориб қўяди.

Томига яширган ўғлининг жасади бир кун уни ошкор қилишидан чўчиркан, 2020 йил 14 февраль куни ярим тунда туриб уни қўшнининг томига олиб чиқиб яширади.

Қинғир ишнинг қийиғи албатта чиқади. 21 февраль куни қўшни томидан топилган жасад жиноятни фош этади.

Суд қотилни узоқ муддатга озодликдан маҳрум қилди.