Куни кеча бўлиб ўтган Республика махсус комиссиясининг Ўзбекистон Республикасига коронавируснинг кириб келиши ва тарқалишининг олдини олиш юзасидан чора-тадбирлар дастурини тайёрлаш бўйича навбатдаги йиғилишида мамлакатимизда коронавирус инфекциясига қарши курашиш бўйича бир қатор масалалар муҳокама қилинди.

Йиғилишда Санитария-эпидемиология хизматига Ўзбекистон Республикасида коронавирус инфекцияси (COVID-19)га қарши эмлашни ўтказиш алгоритми ва алоҳида тартибини ишлаб чиқиш бўйича топшириқ берилганидан барча бохабар. Бунда коронавирус инфекциясига қарши эмлашни фақатгина ихтиёрийлик тамойили асосида амалга ошириш, шунингдек, биринчи навбатда коронавирус юқиш хавфи даражаси юқори бўлган қуйидаги шахсларни эмлаш назарда тутилади:

• 65 ёшдан ошган қариялар ва кексалар; 
• сурункали касалликлари бор шахслар;
• тиббиёт ходимлари;
• мактаб ва мактабгача таълим ташкилотлари;
• аҳоли билан бевосита мулоқотга киришадиган ҳуқуқни муҳофаза қилувчи органлар ходимларидир.

Ўзбекистонда биринчи бўлиб вакцина олдиганлар тоифаларнинг рўйхати маълум қилинди. Бу одамлар вакцинани қачон олиб бошлайди, бу тоифаларга кирмаганларни оммавий эмлаш қачон бошланади деган саволлар юзага келмоқда. Бу ҳақда Коронавирусга қарши кураш штаби қуйидагиларни маълум қилди.

Республикада тоифалар бўйича COVID-19га қарши эмлаш 2021 йилнинг март  ойини биринчи ярмида бошланиши режалаштирилган.

Қорақалпоғистон Республикаси, вилоятлар ва Тошкент шаҳрида жами бўлиб даволаш профилактика муассасалари қошида 3138 та эмлаш хоналари ва 820 та мобил бригадалар ташкил этилган, улар барча эмлаш ишларини жадвал ва  босқичма-босқич амалга оширилади.

Республика бўйича хавф гуруҳига кирувчи аҳолини эмлаш ишлари якунланиши ва республикага вакцина келишига биноан қолган аҳоли ҳам эмланади.

Жаҳон соғлиқни сақлаш ташкилоти томонидан тавсия этилган вакциналар республикада қўлланилади (ҳамкор ташкилотлар томонидан жорий йилда COVID-19га қарши вакцинани амалиётга киритиш учун Ўзбекистон Республикаси аҳолисининг 20 фоизи миқдорида коронавирусга қарши эмлаш учун вакцинага буюртма тайёрланиб, COVAX жамғармасига юборилди).

Ҳозирги вақтда Ўзбекистон Республикаси Санитария-эпидемиологик осойишталик ва жамоат саломатлиги хизмати томонидан GAVI тошкилотининг COVAX жамғармасига, СOVID-19 инфекциясига қарши вакцина ишлаб чиқарувчи 12 та етакчи корхоналар билан ушбу вакциналарни харид қилиш бўйича музокаралар олиб борилмоқда.

Таъкидланишича, жорий йилнинг июль ойига Хитойнинг «Ayhui Zhifei Longcom Biopharmaceutical» Co. Ltd. компанияси томонидан ишлаб чиқилган ва республикамиздаги ўтказилаётган клиник синовлари муваффақиятли ўтгандан сўнг коронавирусга қарши вакцинасини сотиб олиниши ҳам режалаштирилмоқда.