Жорий йилнинг 20 август куни ўтказилган Президентнинг тадбиркорлар билан очиқ мулоқотида билдирилган таклиф ва ташаббуслар асосида 5 та йўналишдан иборат «белгиланган вазифаларни амалга ошириш дастури» доирасида ишлаб чиқиладиган қонунчилик ҳужжатлари лойиҳалари рўйхати тасдиқланди.

Унга кўра, Энергетика вазирлиги 2024 йил октябрига қадар Тадбиркорларга электр энергияси ва газ таъминотидан фойдаланишда енгилликлар бериш бўйича Ҳукумат қарори лойиҳасини ишлаб чиқиши керак.

Лойиҳада ҳисоб китоб даврида тадбиркорлар томонидан электр энергияси ва табиий газ истеъмоли шартномавий миқдордан ортиқ истеъмол қилинган ҳолатлар бўйича қўшимча тўлов ундириладиган шартномавий миқдордан ортиқ истеъмол миқдори чегарасини 10 фоизда 20 фоизга ошириш назарда тутилади. Шу билан бирга, қўшимча тўлов миқдорини белгиланган тарифнинг 2 бараваридан 20 фоизга ошириш режалаштирилмоқда.                                 

Шунингдек, юқори ва ўрта барқарорлик рейтингига эга тадбиркорларга электр энергияси учун олдиндан тўловни бир ой мобайнида иккига бўлиб тўлашга рухсат берилиши мумкин.