Украина элчихонаси рус ашулачиси Григорий Лепснинг Тошкентда режалаштирилган концерти юзасидан Ўзбекистоннинг ваколатли органларига тегишли мурожаат юборган.

Бу ҳақда Украинанинг Ўзбекистондаги элчихонаси маълум қилди.

«Элчихона урушни қўллаб-қувватловчи россиялик санъаткорларнинг Ўзбекистондаги чиқишлари уларнинг Ўзбекистон обрўсига таҳдид соладиган урушни қўзғатишга қаратилган жиноий фаолиятини қўллаб-қувватлашнинг сохта кўринишини яратиши мумкинлигига эътибор қаратади.

Бундан ташқари, россиялик ижрочилар томонидан олинган маблағлар улар томонидан уруш, терроризм ва Украина халқининг геноцидини молиялаштириш учун ишлатилиши мумкин», – дейилади дипломатик муносабатда.

Элчихона, ўз навбатида, урушни қўллаб-қувватловчи россиялик санъаткорларнинг чиқишлари учун Ўзбекистоннинг концерт майдонларидан фойдаланишга қарши чиққани учун ўзбек жамоатчилигига ўз миннатдорчилигини билдирган.

Эслатиб ўтамиз, Россиянинг Украинадаги урушини очиқдан-очиқ қўллаб қувватловчи хонандаларнинг Ўзбекистонда режалаштирилган концертига қарши ўзбек жамоатчилиги норозилиги ва уни бекор қилиш талаблари ортидан жорий йил 3 июл куни Kun.uz нашри ушбу концерт борасида Маданият ва туризм вазири ўринбосари Б.Аҳмедовга юзланган ва ундан «Ўзбекистонда санъат учун ҳеч қандай тўсиқ йўқлиги» мазмунидаги жавобни олган эди.