Париж марказида кучли портлаш ва унинг ортидан ёнғин содир бўлди. Камида 37 киши жароҳатланган. Тўрт нафарининг аҳволи оғир.

Портлаш шаҳарнинг 5-кварталида, Люксембург боғлари ва Пантеондан унча узоқ бўлмаган жойда, Авлиё Жек кўчаси, 277-уйда жойлашган Париж-Америка академияси биносида содир бўлган.

Маълум қилинишича, портлашдан сўнг зарар кўрган бинонинг деворлари йўлга қулаб тушган. Яқин атрофдагилар эвакуация қилинган.

“5-кварталдаги Авлиё Жек кўчасида портлаш содир бўлди. Ўт ўчирувчилар, полиция ва фавқулодда хизматлар воқеа жойига етиб боришган. Менинг айни пайтда бутун хаёлим жабрланганлар ва уларнинг яқинларида”, – дейди Париж мэри Анна Ҳидалго.

Воқеа жойига икки юздан ортиқ ўт ўчирувчилар, қутқарув хизматлари, шунингдек, Париж мери Анна Ҳидалго ҳам етиб борган.

Портлашга газ-ҳаво аралашмасининг чақнаши сабаб бўлгани тахмин қилинмоқда.

Прокуратура портлаш сабабларининг икки версияси – “хавфсизлик қоидаларини бузиш” ва “техника қоидаларига эътиборсизлик”ни текширмоқда.