Жорий йил 22 сентябр куни Наманган вилоятининг Чуст туманида ўнлаб болаларнинг бепул тарқатилган йод препарати истеъмоли сабаб заҳарлангани ҳақида хабарлар тарқалган эди.

Мазкур ҳолат бўйича 3 нафар масъул қамоққа олинди.

Олий суд матбуот хизмати хабарига кўра, Жиноят ишлари бўйича Яшнобод туман судининг 2023 йил 7 ва 16 ноябрь кунларидаги ажримлари билан Бош прокурор ўринбосарининг илтимосномаларига кўра, 3 нафар гумон қилинувчига нисбатан қамоққа олиш тарзидаги эҳтиёт чораси қўлланилиб, тергов ҳибсхонасига жойлаштирилган.

Улар Жиноят кодексининг 167-моддаси (ўзлаштириш ёки растрата йўли билан талон-торож қилиш) 3-қисми «а» банди, 205-моддаси (ҳокимият ёки мансаб ваколатини суиистеъмол қилиш) 2-қисми “а” банди ва 257-1-моддаси (санитарияга оид қонунчиликни ёки эпидемияга қарши кураш қоидаларини бузиш) 1-қисмларида назарда тутилган жиноятларни содир этганликда гумон қилиняпти.

Жиноят-процессуал кодексининг тегишли моддалари тартибида ушланганлар:

• Н. А. (аёл, Республика ихтисослаштирилган эндокринология илмий-амалий маркази лаборатория мудири, катта илмий ходим ходим, Соғлиқни сақлаш вазирлиги Болалар бош эндокринологи, бош мутахассиси);
• Ф. Х. (аёл, Республика ихтисослаштирилган эндокринология илмий-амалий маркази директорининг даволаш ишлари бўйича ўринбосари – бош шифокори, Соғлиқни сақлаш вазирлиги Бош эндокринологи, бош мутахассиси);
• Х. Г. (аёл, Соғлиқни сақлаш вазирлиги Дори воситалари, тиббий буюмлар ва жиҳозлар муомаласини тартибга солиш ва мурувват ёрдамини мувофиқлаштириш бошқармаси бошлиғи лавозимида ишлаган).