Жорий йил 5-6 май кунлари Тошкентда Европа куни фестивали бўлиб ўтди. Европа кўникмалар йили доирасидаги тадбирларда инсон капиталини ривожлантириш тамойилига алоҳида эътибор қаратилди. Шунингдек, Инсон ҳуқуқлари умумжаҳон декларациясининг 75 йиллиги ҳам диққат марказида бўлади.

Мазкур сана доирасида Европа Иттифоқининг Ўзбекистондаги делегацияси пойтахтимизда бир қатор тадбирлар ташкил қилди. Жумладан, 5 май куни Алишер Навоий номидаги Давлат академик опера ва балет театрида классик мусиқа концерти ўтказилди.

6 май куни эса Ботаника боғида Европа куни фестивали уюштирилди. ЕИнинг қирққа яқин лойиҳалари вакиллари Ўзбекистон, умуман, Марказий Осиё билан ҳамкорликнинг муҳим йўналишлари бўйича ўз ютуқларини тақдим этдилар.

«Авлодлар ворисийлиги – ўзбек халқининг ўзига хос фазилати. Ўзбек халқининг «Устоз–шогирд» каби ажойиб анъаналари авлоддан авлодга бенуқсон ўтиб келмоқда. Ёш авлод  ҳунар ва касб кўникмаларини ёши улуғ устозлар қўлида ўрганади. ЕИ ҳам ушбу тажриба ва билим алмашинуви ҳалқасига ўз ҳиссасини қўшаётганидан мамнун. Биз молиялаштираётган лойиҳа ва дастурлар орқали хотин-қизлар, ёшлар ва қишлоқ аҳолиси бугун сув билан ҳаводек зарур бўлган, уларнинг янада униб-ўсиши, ривожланишига кўмак берувчи касбий кўникмалар орттирмоқда», – дейди ЕИнинг юртимиздаги элчиси Шарлотта Адриан.

Европа куни фестивали давомида кўнгилочар дастурлар, эстрада юлдузларининг чиқишлари намойиш этилди, ижодий ва спорт танловлари, маҳорат дарслари ташкил қилинди.

Фестиваль Европа ва Ўзбекистон ўртасида турли соҳалардаги ҳамкорликнинг аҳамияти, ЕИ мамлакатлари маданияти ва анъаналарининг турфа хиллигини намойиш этди.

Маълумот ўрнида, 1950 йил 9 май куни Франция ташқи ишлар вазири Роберт Шуман ягона Европа уйи таъсис этилишига тамал тоши бўлган тарихий нутқини сўзлаган эди. Француз давлат арбобининг Европа бирлигига доир таклифи «Шуман декларацияси» деган ном билан тарихга кирган. Ушбу сана бутун дунёда Европа куни сифатида байрам қилинади.