• Икки ёшли қизимнинг оёқлари ясси, юрганда равон юролмайди. Махсус оёқ кийим олиб бердик, массаж қилдираяпмиз, лекин фойдаси бўлмаяпти маслаҳат беринг...

• Жияним юра бошлаганда оёғини нотўғри босаётганини пайқаб қолдик. Врач туғруқ вақтида сон суяги жойидан силжиган деди. Бунинг қандай давоси бор?..

• Қизим 4 ёшда. Оёғи «Х»симон. Буни тўғирласа бўладими? Қандай чора кўриш керак?..

• Ўғил набирам 3 ёшда. Оёқларининг иккала тиззаси бир бирига яқинлашиб қолябди. Юрганида тиззадан пастида бурчак пайдо бўлади. Қандай тавсия берасиз?..

Бу саволлар азиз фарзандларининг дардига даво излаган жонкуяр ота-оналардан келган. Ҳеч кимнинг жигарбанди касал бўлмасин экан. Аммо дарддан қочиш, чекиниш эмас, унга қарши самарали курашиш керак.

Ортопед-травматолог, тиббиёт фанлари номзоди, малакали шифокор Абдухалил Хўжанов ўз умрини ана шу шарафли ишга бағишлаган. Бугун «Xabar.uz» ахборот таҳлилий портали муштарийлари шифокорнинг маслаҳатларидан баҳраманд бўладилар ва ўз саволларига жавоб оладилар.