Ислом Каримовнинг болаликдаги синфдош дўсти Юрий Белинко Биринчи президентни хотирлади. Бу ҳақда «Замон» информацион дастурида маълум қилинди.

«Ислом Абдуғаниевич ҳамма учун президент эди, аммо мен учун яқин дўст эди. Биз у билан 5-синфдан бошлаб бир синфда ўқидик. Мактабни битиргач, Тошкентда таҳсил олганимизда ҳам бирга эдик»,— дея хотирлайди Белинко.

Белинко синфдоши билан ўртасидаги ришталарни ҳатто сиёсат ҳам бузмаганини айтган. 

«Ислом Абдуғаниевич болалигимизда бу уйга кўп келарди. Бирга дарс қилардик, баҳслашардик. Мен ҳар доим техника билан ишлардим, унинг учун бу жуда қизиқ эди»,—дея қўшимча қилган Белинко.

Синфдоши биринчи президент билан боғлиқ суратларни Каримов фондига топширганлигини маълум қилган.

«У бизнинг синфга келганида рус тилида гапиришга қийналарди. Икки йилнинг ичида у жуда кўп ўқиди ва аълочилар сафига кириб, тилини ўзлаштириб олди. Рус тилини яши биладиганлар хато қилса ҳам у хато қилмас эди»,— дейди у.

Айтиб ўтилишича, кўпчилик Каримовнинг мактаб кундалиги билан қизиқади, унда бирор 4 баҳо ҳам йўқ.