Президент Шавкат Мирзиёев томонидан Халқаро хотин-қизлар кунига бағишлаб ўтказилган байрам тадбирида берилган топшириқлар ижроси доирасида “Микрокредитбанк”да хотин-қизлар учун имтиёзли кредитлар ажратиш шартлари ўзгартирилди.

Энди хотин-қизлар ўз бизнесини бошлаш ёки кенгайтириш учун янада қулай шартларда молиявий кўмак олишлари мумкин.

• “Ҳамроҳ” кредити ставкаси 3% га пасайтирилиб, 20,5% этиб белгиланди. 
• Аёллар раҳбарлигидаги корхоналар ва камида 3 та хотин-қизни иш билан таъминлаган тадбиркорлик субъектлари учун 300 млн сўмгача бўлган кредитлар 2% га арзонлаштирилди. 
• “Водий тадбиркор аёли” кредити орқали 5 нафар хотин-қиз бандлигини яратган тадбиркорлар фоиз ставкасининг 1% га камайишидан фойдаланишлари мумкин. 
• “Истиқболли аёл” кредити ҳам 1 фоизга туширилди ва 50 млн сўмгача бўлган кредитлар нақд шаклда ёки карта орқали ажратилади.

Ушбу имтиёзли кредитлар, айниқса, тикувчилик, ҳунармандчилик, пазандачилик, декоратив санъат каби соҳаларда фаолият юритаётган ёки бу йўналишларда иш бошламоқчи бўлган аёллар учун катта имкониятлар эшигини очади.

Хотин-қизларнинг тадбиркорлик орқали мустақил даромад топиши ва жамиятга фойдали бўлишига хизмат қиладиган бу ташаббус уларнинг орзуларини амалга оширишда муҳим қадам бўлади.

“Микрокредитбанк” бу борада нафақат молиявий, балки маънавий жиҳатдан ҳам уларга таянч бўлишга ҳаракат қилмоқда.