Кеча Сирдарёда «Human.uz» сайти мухбирлари ИИБ ходимларининг навбатдаги босимига учрагани ҳақида хабар бергандик.

Унга кўра, Сардоба фалокати ортидан уй-жойларидан эвакуация қилинган одамлар билан гаплашиб, шароитлари ҳақида репортаж тайёрлашга киришган журналистлар фаолиятига шу ердаги ички ишлар ходимлари очиқдан-очиқ аралашиб, тасвирчини (камераси билан) олиб кетишганди. Камерага ёзиб олинган тасвирлар ИИБ ходимлари томонидан ўчириб ташланган.

Бугун Сирдарё вилоят ИИБ бу хабарга расмий изоҳ бериб ўтди. Қуйида изоҳ келтирилади.

«Ижтимоий тармоқларда, Бугун «Жаҳон матбуоти эркинлиги куни»миди?! Аммо, лекин, бироқ Сирдарёдаги Ички ишлар ходими тўйни азага айлантирмоқчими?!» деб номланган мақола кенг муҳокамага сабаб бўлмоқда.

Мақолада келтирилишича Сирдарё Олимпия заҳиралари коллежига жойлаштирилган одамлар билан гаплашиб, шароитлари ҳақида репортаж тайёрлашга келишгани, бироқ ўша ердаги Ички ишлар ходимлари тасвирчиларни олиб кетишганлигини, «Операторни нега олиб кетяпсиз», деган саволга орган ходими «Сиз қонун талабларига қаршилик қиляпсиз», деганлиги, қандай қонун талаблари бузилгани ҳақидаги саволга жавоб бермаганлиги ва «Обор, записларни кўрасан, ўчириб ташлайсан», дея буйруқ берганлиги такидланиб видеолавҳа илова қилинган.

2020 йил 03 май куни соат тахминан 12-00 ларда «Гулистон Олимпия захиралари мактаб интернати»га карантин қоидаларини бузган ҳолда, ўзларини таништирмасдан нотаниш бўлган икки нафар фуқаролар кириб, фуқароларни видео тасвирга олиб юрганлиги, шу сабабдан ётоқхонага масъул қилиб бириктирилган Ички ишлар органлари ходимлари томонидан ушбу фуқаролардан ўзларини таништиришлари сўралганда ҳеч қандай ҳужжат кўрсатмаганликлари учун шахсига аниқлик киритиш мақсадида 2-сонли ички ишлар бўлимига олиб борилиб, шахсига аниқлик киритилиб, 15-20 дақиқа ўтгандан сўнг «Гулистон Олимпия захиралари мактаб интернати»га қайтариб олиб келинган.

Юқоридаги ҳолат бўйича Сирдарё вилояти ИИБ масъул ходимлари томонидан хизмат текшуруви ўтказилиб, хизмат текшируви хулосасига кўра ходимларнинг хатти-ҳаракатлари хар тарафлама ўрганилиб интизомий чоралар кўрилади», — дейилади муносабатда.

Шу билан бирга Сирдарё вилоят ИИБ Бутунжаҳон матбуот эркинлиги куни билан «юртимизда тезкорлик, аниқлик, холислик билан фаолият юритаётган барча оммавий ахборот воситалари ходимларини бугунги сана муносабати билан яна бир бор муборакбод» этган.

Шу ўринда таъкидлаб ўтиш лозим, ИИБнинг муносабатида журналистлар олган тасвир ўчириб ташлангани ҳақида ҳеч қандай изоҳ келтирилмаган. Яна бир савол: нима учун журналистлардан фақат бир нафари «шахсини аниқлаш учун» 2-сон ички ишлар бўлимига олиб борилгани ҳам очиқ қолган. Агар ОАВ ходимларининг ҳар иккиси ҳам ҳеч қандай ҳужжат кўрсатмаган бўлса, нима учун иккиси ҳам ИИБ бўлимига олиб борилмади?

Xabar.uz воқеалар жараёнини кузатишда давом этади.