Тармоқда «Мактаб илонлар масканига айлангандими?» сарлавҳаси остидаги видеолавҳа тарқалди.

Ушбу ҳолат юзасидан Тошкент шаҳар Мактабгача ва мактаб таълими бошқармаси изоҳ берди.

Жорий йилнинг 10 май куни соат 12:30 атрофида ушбу мактабнинг 6-синф ўқувчиси Ў.А.ни мактаб биносининг иккинчи қавати дераза ром қисмининг тирқишидан илон (дала сув илони) тишлаб олган. Ўқувчига шу вақтнинг ўзида биринчи тез тиббий ёрдам кўрсатилиб, ота-онаси ва синф раҳбари ҳамроҳлигида Тошкент шаҳридаги 16-сонли шифохонага олиб борилган. У ерда ўқувчи Ў.А. тўлиқ тиббий текширувдан ўтказилиб, жиддий жароҳат олмаганлиги аниқланиб, шу куннинг ўзида ўқувчи мактабдаги дарс жараёнларида қатнашган.

Маълумот ўрнида, 348-сонли мактаб биносида 2008 йилдан буён таъмирлаш ишлари олиб борилмаган бўлиб, 2023 йилнинг март-апрель ойларида «Ташаббусли бюджет» лойиҳаси асосида мактабнинг том қисмида мукаммал таъмирлаш ишлари олиб борилди.

Мактаб, давлат Дастурига кўра, 2024 йилда тўлиқ мукаммал таъмирланиши кўзда тутилган.