Жорий йилнинг 21 май куни «Ўзавтосаноат» АЖ ва UzAuto Motors компанияси ташаббуси билан Хоразм вилоятига пресс-тур ташкил этилди. 

Тадбир давомида Хоразм вилояти Питнак шаҳрида очилган янги пресс-мажмуаси намойиш этилди. 

Пресс-мажмуаси «Дамас» ва Labo автомобиллари учун зарур қисмлар ишлаб чиқилади. Янги мажмуанинг ишга туширилиши UzAutoMotors АЖ Хоразм филиали маҳсулотларини экспорт қилиш ҳажмини 50 фоизга ошириш имконини бериши кутиляпти.

Агар 2020 йилда Damas ва Labo автомобиллари 7 миллион АҚШ доллари миқдорида экспорт қилинган бўлса, 2021 йилда бу кўрсаткич 10 миллион АҚШ долларидан ошиши ва 2022 йилда 15 миллион АҚШ долларига етказилиши режалаштирилган.

Мажмуанинг очилишида «Ўзавтосаноат» раҳбари Шавкат Умрзоқов, Хоразм вилояти ҳокими Фарҳод Эрманов, UzAuto Motors бош директори Рустам Ражабов ва бошқа масъуллар қатнашди. 

«Ўзавтосаноат» раҳбари Шавкат Умрзоқовга кўра, ушбу заводни қуришда юз нафар чет эллик мутахассислар жалб этилиши керак бўлган. Уларнинг маоши икки йилда 2 миллион доллардан ошиши кўзда тутилган.

«Биз эса 20 нафар хорижий мутахассис ва 80 нафар ўзимизнинг халқимиз фарзандларини жалб этдик. Завод қуриш ҳам бир илм. Натижада иншоот 24 ойда эмас, 10 ойда битказилди. Бу ерда асосий масала, мана биздаям завод қурадиган йигитлар камолга етди, илм пайдо бўлди. Заводнинг ортидан маҳаллий бюджетга тушумлар 12 миллиард сўмга ошди. Оғир аҳволдаги оилаларнинг 100 нафар аъзоси ишга олинди»,—дейди Умрзоқов. 

Масъуллар нутқидан сўнг, раҳбарлар ва жамоатчилик кўз ўнгида янги пресс-мажмуа ишга туширилди.