NASA rahbari Jim Braydenstayn Zuhro (Venera) sayyorasida fosfin bulutlarini aniqlab, sayyorada hayot alomatlari mavjudligiga ishora qilgan Kardiff va Manchester olimlarining kashfiyotiga munosabat bildirdi.

«Venerada hayot bormi? Anaerob biologiyaning ikkilamchi mahsuli bo‘lmish fosfinning aniqlanishi Yerdan tashqarida hayot borligi haqida ishonchli dalil to‘plash tomon jiddiy qadamdir», — dedi Braydenstayn.

Uning ta’kidlashicha, Zuhroga «birinchi darajali» e’tibor qaratish vaqti keldi.

Fosfin – rangsiz, juda zaharli gaz. Yerda u anaerob, ya’ni kislorod talab qilmaydigan mikroorganizmlar tomonidan ishlab chiqiladi.

Venerada hayot alomatlari borligini isbotlash uchun ilgari ham urinishlar bo‘lgan. Masalan, Rossiya FA Kosmik tadqiqotlar instituti bosh ilmiy xodimi Leonid Ksanfomaliti 2012-yili yozgan maqolada sovet davridagi «Venera-13» qo‘ndiriluvchi stansiyasi moduli olgan suratlar tahlil qilib berilgan. Rus olimi suratlarga tushib qolgan ayrim ob’yektlarni hasharotsimon mavjudotlarga o‘xshatgan.