Afg‘onistonni «Tolibon» o‘z nazoratiga oldi. Mamlakatni rasman kim boshqarishi va yangi hukumatga kimlar kirishi hozircha noma’lum. Ammo ushbu tashkilotdagi asosiy shaxslar haqida ayrim ma’lumotlar bor.

1. Haybatulloh Oxundzoda (1961 y.t.) — 2016 yildan toliblarning oliy qo‘mondoni. Toliblarning birinchi hukmronligi davrida (1996-2001) u shariat sudlaridan birini boshqargan. Harbiydan ko‘ra ko‘proq ilohiyotshunos sifatida nom qozongan. Toliblar orasida qattiq konservator deb hisoblanadi.

2. Abdul G‘ani Barodar (1968 y.t.) — Oxundzodaning siyosiy ishlar bo‘yicha o‘rinbosari. «Tolibon»ning to‘rtta ta’sischisidan biri. Bosh diplomat va harakatning taniqli shaxsi. «Tolibon»ning birinchi hukumatida mudofaa vazirining o‘rinbosari bo‘lgan. Keyinchalik u harbiy operatsiyalar va teraktlarni rejalashtirishda muhim rol o‘ynagan hamda ularni moliyalashtirish uchun javobgar bo‘lgan. Faqat aniq maqsad bilan gapiradigan xotirjam diplomat sifatida ta’riflanadi.

3. Muhammad Yoqub (taxminan 30 yoshda) — Oxundzodaning harbiy ishlar bo‘yicha o‘rinbosari. «Tolibon» asoschisi Mulla Umarning o‘g‘li. U Barodar bilan yaxshi munosabatda deb hisoblanadi va u bilan birga harakatning nisbatan mo‘’tadil qanoti vakili.

4. Sirajuddin Haqqoniy (taxminan 45 yoshda) — otasining vafotidan so‘ng, u yaratgan «Haqqoniy tarmog‘i» guruhini boshqarib, «Tolibon» safiga qo‘shilgan. «Tarmoq» toliblarning eng uyushgan va jangovar qobiliyati yuqori qismi hisoblanadi. O‘tgan yili New York Timesda chop etilgan maqolasida shunday degan: «Hamma urushdan charchagan. Ishonchim komilki, odam o‘ldirish va mayib qilishni to‘xtatish kerak».

5. Abdul Hakim — ilohiyotshunos, taxminan Oxundzodaning tengdoshi va uning yaqin safdoshi. U kabi, hech qachon dala qo‘mondoni bo‘lmagan. Prognozlarga ko‘ra, u Afg‘onistondagi shariat sudlari tizimini boshqarishi mumkin.