Shri-Lanka hukumati bugun, katoliklarning pasxa bayrami vaqtida cherkovlar va mehmonxonalarda bo‘lgan portlashlar tashkilotchilari aniqlanganini bildirdi.

«Qaysi diniy ekstremizmga mansub bo‘lishlaridan qat’iy nazar, biz ularni ta’qib qilishda davom etamiz. Biz ularga nisbatan chora-tadbirlar ko‘ramiz va mamlakatda erkin harakat qilishlariga yo‘l qo‘ymaymiz»,— deydi mudofaa vaziri Ruvan Viyevarden.

Biroz vaqt muqaddam Shri-Lankadagi portlashlar National Thowheeth Jama’ath musulmon radikallari jamoasi tomonidan uyushtirilgan bo‘lishi mumkinligi tahmin qilingan edi. Politsiya tomonidan berilgan ma’lumotlarga qaraganda, 10 kun muqaddam portlashlar haqida ogohlantirishlar bo‘lgan. Kamida ikki holatda terrorchi bino ichida o‘zini portlatib yuborgani aytilmoqda.

Eslatib o‘tamiz, bugun, 21 aprel erta tongda Shri-Lankada qatorasiga 8 ta portlash bo‘lib o‘tdi. Oxirgi ma’lumotlarga qaraganda 207 kishi halok bo‘lgan va 500 dan ortiq insonlar yaralangan.

Halok bo‘lganlar orasida 35 nafar xorij fuqarosi bor.