Checheniston rahbari Ramzan Qodirov Falastinni qo‘llab-quvvatlashini va bu urushga qarshi ekanini ma’lum qildi.

Qodirov jahon hamjamiyatini «bir marta bo‘lsa ham» Falastin masalasida «adolatli qaror» qabul qilishga chaqirdi. Shuningdek, u musulmon davlatlari rahbarlariga murojaat qilib, «Yevropa va butun G‘arbni jangarilarni yo‘q qilish bahonasida tinch aholini bombardimon qilmaslikka undashga» chaqirdi.

«Ular u yerda hech qanday jangari yo‘qligini bilishadi, shunchaki qo‘rqitish uchun ular portlatishadi, o‘ldirishadi» — deydi Checheniston rahbari.

Qodirov Falastinni qo‘llab-quvvatlashini, chunki «Isroil bir vaqtlar ularning yerlarini tortib olib, mamlakatni qamalda ushlab kelayotganini» aytdi. Uning fikriga ko‘ra, urush shunchaki tugamaydi.

Qodirov bir bor Isroilda bo‘lganini va u yerda «muqaddas joy»ni ziyorat qilganini aytdi.

«Biz bilan birga eskortlar bor edi va ular bizni to‘xtatib, u yerda shovqin ko‘tarishimiz uchun bizni g‘azablantirishga urinishdi. Lekin biz kutdik. Asosiy maqsadimiz Al-Aqso masjidiga kirib namoz o‘qish edi», — dedi Qodirov. U, shuningdek, raketa hujumidan zarar ko‘rgan Abu G‘oshdagi Ahmat Qodirov masjidini tilga oldi va tomonlardan unga hamda Al-Aqsoga tegmaslikni so‘radi.

Qodirov zarurat tug‘ilsa, mojaro hududiga tinchlikparvar kuchlarni yuborishga tayyorligini bildirdi. «Biz kim haq va kim nohaq ekanligini aniqlaymiz va kurashni davom ettirayotganlarni to‘xtatamiz», dedi Checheniston rahbari.