Somali poytaxti Mogadishoda Hayat mehmonxonasiga Ash-Shabob jangarilari (Al-Qoida bilan aloqador terrorchi guruh) bostirib kirishi oqibatida 21 kishi halok bo‘ldi. Bu haqda BBC xabar berdi.

Politsiya ma’lumot berishicha, jangarilar mehmonxona yonida portlovchi ikkita qurilmani ishga tushirishgan, so‘ngra ichkariga bostirib kirib, o‘q yog‘dirishgan.

Somali xavfsizlik kuchlari jami 106 kishini qutqargan.

«Begunoh odamlar halok bo‘lgani dahshatli, xavfsizlik kuchlari qutqarish uchun bor imkoniyatini ishga solgandi», — dedi Mogadisho politsiyasi rahbarlaridan biri Abduhasan Muhammad Hijra jurnalistlarga.

Mamlakat sog‘liqni saqlash vaziri Alihoji Adan bayonot berishicha, qurbonlar soni oshishi mumkin, chunki rasmiy hisob olinganiga qadar qarindoshlari jasadlarni olib ketgan bo‘lishlari mumkin. U qo‘shimcha qilishicha, jangarilarning hujumi oqibatida 117 kishi jarohatlangan, shundan 15 nafari og‘ir ahvolda.

«Otishma va portlashlar qo‘rqinchli edi. Bu men Mogadishoda ko‘rgan eng dahshatli narsalardan biri», — voqeaga munosabat bildirdi Somali razvedka boshqarmasi direktorining sobiq o‘rinbosari Abdusalom Guled.

Mehmonxonani jangarilardan tozalash va odamlarni qutqarishga 30 soatdan ko‘p vaqt ketdi. Xavfsizlik kuchlari tepa qavatlarga chiqish uchun bir necha soat urinishdi — odamlarni garovga olgan jangarilar zinalarni portlatib yuborishgandi.