Rossiya prezidenti Vladimir Putin chet elliklar va mehnat muhojirlari uchun pullik asosda COVID-19 ga qarshi emlashni amalga oshirishni buyurdi. Davlat rahbari Sankt-Peterburg xalqaro iqtisodiy forumi yakunlari bo‘yicha tegishli ko‘rsatmalar berdi, deb xabar beradi TASS 27-iyun, yakshanba kuni.

Qayd etilishicha, 30-iyungacha Putin mamlakatda chet elliklar uchun koronavirusga qarshi pullik emlashni amalga oshirish imkoniyatini ta’minlash hamda 15-iyulga qadar esa mehnat muhojirlarini emlash kampaniyasini tashkil etish to‘g‘risida hisobotni kutmoqda.

15-iyun kuni Vladimir Putin muhojirlarning Rossiya Federatsiyasi hududida sanksiyalarisiz vaqtincha bo‘lish muddatini uzaytirishni ma’qulladi. Imzolangan farmonga binoan, qonunbuzarliklar bo‘lmasligi sharti bilan chet elliklar 30-sentyabrga qadar chiqarib yuborilmaydi. Qamoqdan ozod qilingan shaxslar, Rossiya davlat chegarasi to‘g‘risidagi qonun hujjatlarini buzuvchilar, shuningdek milliy xavfsizlikka tahdid soluvchi shaxslar bundan mustasno.