Kiyev meri Vitaliy Klichko o‘zining o‘rinbosari hisoblanmish Vladimir Slonchakni ishdan bo‘shatdi. Politsiyachini urgani uchun unga qarshi jinoiy ish qo‘zg‘atilgan. Bu haqda «RBK-Ukraina» xabar berdi.

«O‘ylaymanki, sizlar yangiliklar orqali kecha kechqurun nima sodir bo‘lganini ko‘rgan bo‘lsangiz kerak. Men shahar hokimiyatining, birinchi navbatda, uning vakillari tomonidan obro‘sizlantirilishiga yo‘l qo‘ymayman», — dedi Kiyev hokimi.

Uning so‘zlariga ko‘ra, amaldor o‘z xatti-harakati uchun javob berishi zarur.

Avvalroq 27-aprel kuni Slonchak politsiya xodimiga hujum qilgani uchun hibsga olingani ma’lum bo‘ldi. Hodisa 26-aprel, yakshanba kuni sodir bo‘lgan. Patrul xizmati chiroqlarini yoqmasdan kelayotgan «Mercedes» avtomobilini to‘xtatgan. Rul boshqaruvida shahar kengashi deputati Lyudmila Kostenko bo‘lgan. U alkogolga test topshirishdan bosh tortgan. Mashinada Kostenko bilan ketayotgan vitse-mer Slonchak to‘satdan politsiyachiga musht tushirgan. Jabrlanuvchi shifoxonaga yotqizilgan, mashina esa jarima maydonchasiga olib ketilgan. Amaldor besh yilga qamalishi mumkin.