Daniyalik ixtirochi Peter Madsen o‘zi haqida reportaj tayyorlagan shvetsiyalik jurnalist qiz Kim Vallni o‘ldirganiga iqror bo‘ldi. Bu haqda «SVT Nyheter» xabar berdi.

«Uning o‘limida men aybdorman. Jinoyatni men sodir etganman», — iqror bo‘ldi Madsen shved jurnalistining o‘limiga bag‘ishlangan hujjatli filmda.

Madsen shuning barobarida zo‘ravonlikka moyil emasligini, bundan hammadan ko‘ra ko‘proq o‘zi aziyat chekishini ham qo‘shimcha qilgan.

Ma’lumot uchun: Kim Vall 2017-yilning 10-avgustida bedarak yo‘qolgandi. U Madsenning konstruktorlik ishlari haqida reportaj tayyorlash uchun u bilan birga «Nautilius» qo‘lbola suvosti kemasida dengizga ravona bo‘lgandi.

Ertasi kuni suvosti kemasi halokat signalini yo‘llaydi. Voqea joyiga yetib borgan qutqaruvchilar kema bortida yolg‘iz Madsenga duch kelishadi.

Daniya politsiyasi 2017-yilning oktyabrida qizning tana bo‘laklari og‘ir metall bilan birga joylangan plastik paketni topadi...

Tergov chog‘i o‘z ko‘rsatmalarini tinmay o‘zgartirgan Madsen endi nihoyat aybiga iqror bo‘ldi: Vallning jasadini bo‘laklab suvga tashlab yuborganini tan oldi. Ammo qizning o‘limiga is gazi sabab bo‘lganini aytmoqda.

Uch yil avval ekspert-psixiatrlar ixtirochini patologik yolg‘onchi, atrofdagilar uchun xavfli shaxs deb topishgan, sud Madsenni bir umrga ozodlikdan mahrum etgandi.