Yaqinda ijtimoiy tarmoqlarda bir e’longa ko‘zim tushib qoldi. Unda yozilishicha, «O‘zbekenergo» aksionerlik jamiyati aholiga qulay bo‘lishi uchun «telegram» ijtimoiy tarmog‘ida kanal ishga tushiribdi, aholi elektr energiyasi bilan bog‘liq muammolari haqida ana shu kanalga yozishi mumkin ekan. Kanalga darrov a’zo bo‘ldim va «O‘zbekenergo» xodimlari aholi murojaatiga qanchalik tez javob qaytarishini va oxirgi paytlarda mahallamizda yuz berayotgan elektr taqchilligi sababini bilish va bu masalada yordam berishlarini so‘rab yozib, kanal administratoriga murojaat qildim.

Men murojaatimni yozganimda viloyatimiz, tumanimiz, mahallamiz nomini yozibmanu o‘zimning ism-familiyam va telefon nomerimni yozmabman. Shu tufayli «Hurmatli fuqaro, o‘z ism-familiyangiz va telefon raqamlaringizni ham yozing» degan javob keldi. Kechiktirmasdan o‘zim haqimdagi ma’lumotlarni ham yozib jo‘natdim. Oradan ikki soat o‘tib menga noma’lum bir raqamdan qo‘ng‘iroq bo‘ldi. Tumanimiz elektr tarmoqlari korxonasidan qo‘ng‘iroq bo‘layotgan ekan. Ular muammoni so‘rashdi. Aytdim. Amaliy yordam beramiz deb va’da berishdi. Elektr energiyasi ta’minoti o‘sha kuniyoq yana ancha yaxshilandi.

Oradan uch kun o‘tib mahallamiz faollariga o‘sha murojaatim haqida aytgan edim, ular mahallamiz hududidagi transformator foydalanuvchi ko‘payib ketganligi tufayli zo‘riqish bilan ishlayotgani, shuning uchun uni yo kattarog‘iga almashtirish yoki yana bitta yangi transformator o‘rnatib berishlarini so‘rab murojaat yoz deyishdi. Men mahalla ahli nomidan yozib yubordim. Bu safar ham ikki soatda qo‘ng‘iroq bo‘ldi. Samarqand viloyat elektr tarmoqlari korxonasi boshlig‘i ekan (ismini Mahmud aka dedi, familiyasini so‘rab o‘tirmadim). U muammoni so‘radi va keyin mahalla raisi nomidan viloyat elektr tarmoqlari korxonasiga yozma murojaat bilan chiqishimizni, shundan so‘ng xodimlar borib vaziyatni o‘rganishlarini va lozim topilsa yangi transformator o‘rnatib berilishini yoki hozirgi transformatorimiz kuchliroq transformatorga almashtirib berilishini aytdi.

Meni qoyil qoldirgan jihati shu bo‘ldiki, kompaniya uyda o‘tirib, telefondan yozib yuborgan murojaatimga ikki soatdan kechiktirmasdan javob berayapti. Qilinayotgan murojaatlar ortidan muammolarning qanchalik bartaraf etilayotgani yoki etilmayotgani boshqa masala. Muhimi siz istalgan joydan telefoningiz orqali bog‘lanaverasiz va kompaniya xodimlari ikki-uch soatdan kechiktirmasdan «nima muammo?» deb siz bilan bog‘lanishayapti va bu ish aholi uchun nihoyatda qulay bo‘layapti.

Shu yerda «O‘zbekenergo»ning bu ibratli ishini boshqa vazirliklar, qo‘mitalar, kompaniyalar ham joriy qilishi kerak degan xulosaga kelayapman. Chunki hozir joylarda turli muammolar yuzasidan kimga va qayerga murojaat qilishni bilmay yurgan odamlar ko‘p. Uzoqqa bormaylik, Toshkentga ishim yuzasidan tez-tez borib kelishimni biladigan mahalladoshlarim «falon muammo yuzasidan xat yozgan edim, shuni Toshkentga olib ketib, kerakli joyga yetkazsang» deb tez-tez so‘rashadi. Bu murojaatlar turli idora va vazirliklarga yozilgan bo‘ladi. Ularga javob kelishi uchun xam necha kundir vaqt kerak. Agar turli vazirlik, qo‘mita, kompaniyalar «telegram» ijtimoiy tarmog‘ida kanal ochib, «O‘zbekenergo»ga o‘xshab muammolarni qabul qilib, keyin unga zudlik bilan sanoqli soatlarda javob berishni yo‘lga qo‘ysalar, aholi uchun nihoyatda qulay bo‘lar edi.

Shu yerda o‘quvchilarda «Kim hozir xat yozar ekan? Ana www.my.gov.uz, www.pm.uz kabi saytlar orqali murojaat qilaveradi-da» degan fikr tug‘ilishi mumkin. To‘g‘ri, ammo o‘sha saytlarda murojaat yoki takliflarni yozish uchun oldin ro‘yxatdan o‘tish lozim ekan. Ammo telefon orqali emas, faqat kompyuter orqali o‘tilar ekan. Hozir ko‘pchilikda kompyuter bo‘lmasa ham hammada telefon borligini inobatga oladigan bo‘lsak, yuqoridagi saytlar orqali murojaatdan ko‘ra oddiygina telefon orqali murojaat qilish axoli uchun qulayroq. Bu masalaning bir tarafi. Ikkinchi tarafi shundaki, agar turli vazirlik, qo‘mita, kompaniyalar «O‘zbekenergo»day «telegram» ijtimoiy tarmog‘i orqali aholi uchun qulay murojaat kanali ochib qo‘ysalar aholi o‘sha muammo tegishli bo‘lgan vazirlik, qo‘mita yoki kompaniyaning o‘ziga to‘g‘ridan-to‘g‘ri murojaat qilishi va masalaning tezroq ko‘rib chiqilishiga zamin yaratar edi.

Masalan, «O‘zbekiston temir yo‘llari», «O‘zbekiston havo yo‘llari» kabi kompaniyalar murojaatlar uchun kanal ishga tushirsa, aholi bu kanal orqali o‘ziga kerak bo‘lgan barcha ma’lumotlarni tezda bilib olaverar edi. Yoki chiptalar masalasida qandaydir muammolar chiqsa, kompaniyaga ana shu kanal orqali to‘g‘ridan-to‘g‘ri murojaat qilib muammolarini hal qilaverar edi. Yoki IIV va uning turli boshqarmalariga murojaat ham oson yetib borar va ular tomonidan tez javob qaytarilar edi.

Men yuqorida «O‘zbekenergo» murojaatimga ikki-uch soatda javob berdi dedim. Bu xizmatni takomillashtirib undan ham tezroq javob beradigan qilsa bo‘ladi.

Albatta, bu yozganlarim bir taklif xolos. Ammo davlatimizning eng asosiy maqsadlaridan biri odamlarning muammolarini zudlik bilan hal qilish, ularga qulaylik yaratish ekan, mening bu fikrlarimni tegishli tashkilotlar o‘ylab ko‘radilar va ijobiy qaror chiqaradilar deb o‘ylayman.

«O‘zbekenergo» bilan bilan bog‘lanish uchun: 

https://t.me/uzbekenergomuloqot/10     @uzbekenergo_admin        @uzbekenergomuloqot