Bugun, 9 oktyabr kuni Toshkentda Yevropa Ittifoqi ta’lim ko‘rgazmasi boshlandi. Alisher Navoiy nomidagi Toshkent davlat o‘zbek tili va adabiyoti universitetida o‘tayotgan tadbirda Yevropaning 20 ga yaqin nufuzli oliy ta’lim dargohlarida o‘qish imkoniyati taqdim etilmoqda.

YeIning O‘zbekistondagi delegatsiyasi va Erasmus+ milliy ofisi tashkil etgan ikkinchi ta’lim ko‘rgazmasida Ispaniya, Polsha, Belgiya, Bolgariya, Italiya, Fransiya, Chexiya, Ruminiya, Germaniya va Slovakiya vakillari o‘zbekistonlik yosh iqtidor egalariga bakalavriat, magistratura va aspirantura dasturlari bo‘yicha yo‘l-yo‘riq bermoqda.

«Yevropa Ittifoqi ilg‘or ta’lim va tadqiqot markazi sifatida tanilgan. YeI mamlakatlarida dunyoning yetakchi universitetlari joylashgan bo‘lib, bu uni global oliy ta’lim bozorida muhim ishtirokchiga aylantiradi. YeI o‘zbekistonlik talabalarni quchoq ochib kutib oladi. O‘zbekistonning yanada gullab-yashnashi uning iqtidorli yoshlariga bog‘liq. YeI universitetlarida olingan oliy ta’lim global bilim va ko‘nikmalarni yaratadi. Bitiruvchilar o‘z vatanlariga qaytganlaridan so‘ng mamlakat taraqqiyotiga hissa qo‘shadilar», – deydi Yening O‘zbekistondagi elchisi Sharlotta Adrian.

Ko‘rgazma 11 oktyabr kuni Samarqanddagi «Ipak yo‘li» Xalqaro turizm va madaniy meros universitetida, 13 oktyabr kuni Namangan madaniyat markazida ham o‘tkaziladi.

Mazkur tadbir Erasmus+ loyihalari doirasida institutsional hamkorlikni kengaytirishda ham muhim ahamiyat kasb etadi.

Erasmus Mundus – iqtidor egalarining ta’lim, kasbiy va shaxsiy rivojlanishini qo‘llab-quvvatlashga qaratilgan YeI dasturidir. Qo‘shma magistrlik tahsili doirasida o‘quv dasturi, sayohat xarajatlari, sug‘urta, vizani qo‘llab-quvvatlash, oylik stipendiya va boshqalarni o‘z ichiga olgan grant taqdim etiladi.

Avval xabar berganimizdek, bu yil 11 nafar o‘zbekistonlik iqtidorli talaba Erasmus Mundus qo‘shma magistrlik dasturi stipendiyasini qo‘lga kiritdi.