2020/2021-o‘quv yilida bakalavriat ta’lim shaklida 1-kurs talabalari o‘qishni 12 oktyabrdan boshlashadi. Bu haqda Oliy va o‘rta maxsus ta’lim vazirligi bosh boshqarmasi boshlig‘i Abduvali Xoliqov ma’lum qildi.

«Oliy ta’limda 2020/2021-o‘quv yilini masofaviy tarzda boshladik. Birinchi kurs o‘quvchilari uchun ham o‘quv yili masofaviy tarzda boshlanadi. Birinchi kursga tavsiya etilgan talabalarning hujjatlari to‘liq rasmiylashtirilib bo‘linganidan keyin, 12 oktyabrdan boshlab oliy ta’lim muassasalarida 3 kundan 2 haftagacha tanishuv darslari tashkil qilinadi. Bu tanishuv darslari karantin qoidalariga to‘la amal qilingan holatda auditoriyaga 50 foizdan oshmagan talabalarni kiritib, karantin talablari asosida tashkil etiladi», – dedi Abduvali Xoliqov.

Ma’lum qilinishicha, talabalar turar joylariga talabalar joylashtirilmaydi. Uzoq hududlardan Toshkentdagi OTMlarga o‘qishga kirgan talabalar uchun o‘sha hududdagi OTMning moddiy texnik-bazasidan foydalangan holda hududdagi yoshlarni yig‘ib, tanishuv darslari tashkil etiladi. Bunda uzoq hududlarga Toshkent shahridagi OTMlar professor-o‘qituvchilari borib, tanishuv darslarini tashkil qiladi. Tanishuv darslari kuniga 2 juftlikdan ortiq bo‘lmagan holda, juftliklar orasida 10 daqiqalik tanaffus bo‘ladi.

«Bu darslarda yangi qabul qilingan talaba oliy ta’lim muassasasi va undagi o‘qituvchilar va dars jadvallari bilan tanishtiriladi. Bu yerda 1-kursga qabul qilingan talabalarning masofaviy ta’lim olish ko‘nikmasini shakllantiramiz», – dedi Abduvali Xoliqov.