AQShdagi futbol klubi (amerikancha futbol) — «Washington Redskins» («Vashingtonlik qizil tanlilar») irqiy ayblovlardan so‘ng, rebrending o‘tkazib o‘z nomini o‘zgartirishga majbur bo‘ldi. Bu haqda «Reuters» xabar berdi.

18 oy davom etgan muzokaralardan so‘ng jamoa rahbariyati «Washington Commanders» nomini ma’qulladi.

Ushbu nom 40 mingdan ziyod muxlislarning xatlari, sanoqsiz so‘rovnomalar va uchrashuvlar natijalarini o‘rganishdan so‘ng tanlandi.

Jamoa egalaridan biri, 1999-yilda franshizani qo‘lga kiritgan Den Snayder rebrending maslasini uzoq vaqtgacha paysalga solib kelgan, hatto klub nomini o‘zgartirmaslikka qasam ichgandi.

Ma’lumot uchun: jamoaga 1932-yilda asos solingan bo‘lib, bazasi Landover (Merilend shtati)da joylashgan. 2020-yilgacha «Washington Redskins» nomi ostida faoliyat yuritgan, emblemasida ham bu aksini topgandi. Irqiy mojarolar sababli 2020-2021 yillarda vaqtincha «Vashington futbol jamoasi» («Washington Football Team») nomi ostida o‘ynadi.