Zayniddin Zidan boshchiligidagi «Real Madrid» jamoasi La Liga tugashiga bir tur qolganida chempionlikni qo‘lga kiritdi. Klub 34-marta Ispaniya chempioniga aylandi.

Karim Benzemaning dubli «Vilyarreal»  ustidan 2:1 hisobidagi g‘alabani ta’minladi. Fransuz hujumchisi 29-daqiqadagi hujum va 77-daqiqada Serxio Ramos ishlagan penaltidan raqib darvozasini ishg‘ol qildi. Avvaliga hakam madridliklar sardori darvozaga tepmasdan Benzemaga oshirib bergan uzatmadan urilgan golni hisobga olmadi. Penaltini bu safar o‘zi tepgan Karim hisobni oshirdi.

O‘yin oxirlarida faollashgan mehmonlar o‘rtadagi farqni qisqartirishdi, hatto hisobni tenglashtirishlari ham mumkin edi. Bunga esa Tibo Kurtua yo‘l qo‘ymadi. Orada Asensio urgan uchinchi gol ham bekor qilindi — ungacha to‘p Benzemaning qo‘liga tekkan edi.

Real Madrid — Vilyarreal — 2:1

Gollar: Benzema (29; 77 — penalti) — Iborra (83).

«Real» so‘nggi 38-turda (19-iyul) La Ligada jon saqlab qolish uchun kurashayotgan «Leganes» mehmoni bo‘ladi.