Singapurning eng ommabop nashrlardan biri bo‘lgan, 352 ming nusxada chop etiladigan «The Straits Times» gazetasi O‘zbekiston Olimpiya terma jamoasining Osiyo chempionatidagi g‘alabasi haqida maqola e’lon qildi.

Maqolada shunday deyiladi: «Vetnam va O‘zbekiston terma jamoalari o‘rtasidagi U-23 Osiyo chempionati finalini Vetnamning 90 millionlik aholisi bir tanu bir jon bo‘lib birgalikda tomosha qilishdi. Xanoy shahri ko‘chalari go‘yoki qizil dengizga o‘xshar edi».

«Vetnam butun o‘yin davomida kuchli raqibga qarshi munosib harakat qildi. Ayniqsa, ekstra-taymlar yakuniga yetib, penaltilar seriyasi yaqinlashgani sari vetnamlik muxlislarda umid uchqunlari paydo bo‘layotgandi.

Uchrashuvni birgalikda tomosha qilayotgan muxlislar o‘rtasida ajoyib kayfiyat, ajoyib muhit hukmron edi. Ammo O‘zbekiston terma jamoasi so‘nggi daqiqada gol urganidan keyin butun Xanoy shahri jim-jit bo‘lib qoldi. Go‘yoki hamma narsa to‘xtab qolgandek edi... » — deyiladi maqolada.