O‘FF prezidenti Umid Ahmadjonov rahbarligidagi delegatsiya ertaga Farg‘ona viloyatiga tashrif buyuradi. Bu haqda O‘FF rasmiy saytida xabar berilgan.

Xabarda aytilishicha, yangi mavsumdan boshlab milliy chempionatimizda ishtirok etadigan futbol klublarining professionallik darajasini oshirish uchun klublar oldiga jiddiy talablar qo‘yilmoqda.  Ushbu talablarni bajarish uchun 1 fevralga qadar muhlat berilgan bo‘lib, talablarni bajarmagan klublar milliy chempionatda ishtirok eta olmaydi. O‘FF tomonidan viloyatlardagi holat doimiy ravishda nazorat qilib borilmoqda.

Tashrif mobaynida delegatsiya Farg‘ona viloyati Futbol federatsiya tomonidan qilinayotgan ishlar bilan tanishadi. O‘FF tomonidan Farg‘ona viloyati FFda faoliyat olib borayotgan kadrlar ishi ko‘rib chiqiladi.

Shuningdek, tashrif chog‘ida mamlakatimiz klublari qoshidagi akademiyalardagi bolalar va o‘smirlar bilan shug‘ullanish uchun yo‘nalishga xorijlik murabbiylarni jalb qilish masalasi ko‘tariladi. Delegatsiya a’zolari “Neftchi” PFK o‘quv-yig‘in bazasi, klub akademiyasi, Farg‘ona shahridagi “Istiqlol” futbol klubi stadioni, Olimpiya zaxiralari kolleji faoliyati bilan yaqindan tanishadi. Bundan tashqari, Quvasoy shahridagi “Sementchi” pfk o‘quv-yig‘in bazasiga tashrif amalga oshiriladi. Bundan tashqari, Farg‘ona viloyati Futbol federatsiyasi matbuot xizmati ishini yo‘lga qo‘yish va muxlislar bilan ishlash bo‘yicha yangi loyihalarni ko‘rib chiqish kabi bir qator masalalar ham muhokama etiladi.

O‘zbekiston Futbol federatsiyasi prezidenti tomonidan bunday tashriflar barcha viloyatlar bo‘ylab o‘tkazilishi rejalashtirilgan.