Osiyo chempionlar ligasi «V» guruhida «Lokomotiv» safarda Abu Dabining «Al-Vahda» klubini yirik hisobda mag‘lubiyatga uchratdi.

Sardor Mirzayev uchrashuvning 4-daqiqasida hisobni ochgan bo‘lsa, birinchi bo‘lim oxirlarida uni yiriklashtirdi.

Ikkinchi bo‘limda Sanjar Shoahmedov raqib darvozasini ishg‘ol qildi. O‘yining 88-daqiqasida mezbonlar futbolchisi hisobni biroz qisqartirdi. Uchrashuvning so‘nggi daqiqasida «Lokomotiv» yana gol kiritishga muvaffaq bo‘ldi.

OChL, V guruhi. 5-tur

«Al-Vahda» – «Lokomotiv» 1:4 (0:2)

Gollar: Ismoil (88) – S.Mirzayev (4, 39), S.Shoahmedov (55), Rashid (89-avtogol)

«Al-Vahda»: Muhammad Al Shamsi, Ahmad Rashid, Al Menhali, Rim Chang Vo, Holid Aldahani, Hamdan Al Kamol, Nosir Abdulhodi, Ismoil Matar, Murad Batna, Sebastyan, Muhamad Al Akbari.

«Lokomotiv»: Ignatiy Nesterov, Islom To‘xtaxo‘jayev, Shuhrat Muhammadiyev, Kaxi Maxaradze, Sanjar Shoahmedov, Sadriddin Abdullayev, Ikrom Aliboyev, Sardor Mirzayev, Igor Yelich, Nivaldo, Marat Bikmayev.

Shunday qilib «temiryo‘lchilar» guruhning so‘nggi turi oldidan muhim uch ochkoni qo‘lga kiritdi. Natijada «Lokomotiv» turnir jadvalida 6 ochko jamlab, ochkolar hisobida «Zob Ohan»ga yetib oldi. Bu jamoalar ikkinchi va uchinchi o‘rinlarni egallab turishibdi. So‘nggi turda aynan ushbu jamoalar o‘zaro bellashadi. «Lokomotiv» keyingi bosqichga chiqishi uchun Toshkentda Eron klubini mag‘lub etishi zarur bo‘ladi. Demak, hammasi poytaxtliklarning o‘z qo‘lida.