Italiya kubogining yana bir finalchisi aniqlandi. Ikki o‘yin natijasiga ko‘ra Milanning «Internatsionale» klubidan ustun kelgan «Napoli» finalga yo‘l oldi.

Koronavirus pandemiyasi boshlanmasidan avval Milanda bo‘lib o‘tgan ilk o‘yinda «Napoli» 1:0 hisobida g‘alaba qozongandi. Javob o‘yinida jamoaga durang ham kifoya qilardi. Biroq Neapoldagi o‘yinning uchinchi daqiqasidayoq «Inter» oldinga chiqib oldi — Kristian Eriksen burchak zarbasidan to‘pni darvozaga joylab qo‘ydi.

Biroq «Napoli» tanaffusga ortiqcha tashvishsiz chiqib ketish uchun o‘zida kuch topa oldi. Eriksenning golida «bosh aybdor» — darvozabon Ospina o‘z xatosini yuvdi va qarshi hujumni boshlab berdi. Hujumga so‘nggi nuqtani qo‘ygan Dris Mertens ham jamoani finalga olib chiqdi, ham «Napoli» tarixidagi eng sermahsul futbolchiga aylandi: 122-golini urgan belgiyalik Hamshek va Maradonadan o‘tib ketdi.

«Inter»ning ikkinchi golni urish uchun urinishlari besamar ketdi, hisob — 1:1, «Napoli» Italiya kubogi finalida o‘ta jiddiy raqib — «Yuventus» bilan to‘qnashadi.