«Pari Sen-Jermen» va Argentina terma jamasi forvardi Lionel Messi Qatar-2022dagi g‘alabaga qadar bosib o‘tilgan yo‘lni esga oldi.

«Jahon chempionatida g‘alaba qozonishni qanchalik istagandim? Juda. Oldingi jahon chempionatlari, zafarga bir qadam qolganda men boy bergan 2014-yilgi mundial, terma jamoadagi uzoq faoliyatdan so‘ng, nihoyat uddaladim.

Mundialdagi g‘alabagacha yo‘l ko‘plab yo‘qotishlar, mag‘lubiyatlar, og‘ir damlardan iborat bo‘ldi. Hammasini boshdan o‘tkazdim. Fantastik tarix», — Messidan iqtibos keltirdi Ole.

Eslatib o‘tamiz, Qatar-2022 finalida 18-dekabr kuni Argentina Fransiyani yengib, yangi chempionga aylandi. Asr finaliga aylangan o‘yinning asosiy vaqti 2:2 hisobida tugagan, qo‘shimcha vaqtlarda tomonlar bittadan gol urgan, o‘yindan keyingi penaltilar seriyasida argentinaliklarning omadi chopgandi (4:2).

Lionel Messi Qatar-2022ning eng yaxshi futbolchisi deb topilgandi.

Darvoqe, JCh-2022 finali — Argentina-Fransiya uchrashuvi bugun soat 21:00 da «Sport» telekanalida takroran namoyish etiladi.