«Manchester Siti» yarim himoyachisi Kevin De Bryuyne «X» sahifasida yozda jamoani tark etishini ma’lum qildi.

«Bu oylar «Manchester Siti»dagi futbolchilik faoliyatimning so‘nggi oylari bo‘ladi. Bu haqida yozish juda og‘ir. Har bir futbolchi bu kun albatta kelishini biladi. Va mana u kun keldi. Siz bu haqida birinchilardan bo‘lib eshitishga loyiqsiz. Futbol meni sizga, bu shaharga, bu klubga, bu odamlarga olib keldi. Men orzularim ortidan quvib yurgan edim, lekin bu yo‘l hayotimni butunlay o‘zgartirishini tasavvur ham qilmaganman. Bu shahar. Bu klub. Bu odamlar... menga hamma narsani berdi. Men ham buning evaziga borimni berdim. Ishonasizmi, biz hammasiga erishdik. Manchester faqat farzandlarimizning pasportida emas, balki undan ham muhimi — yuragimizda abadiy qoladi. Bu joy har doim bizning uyimiz bo‘lib qoladi. Shaharga, klubga, xodimlarga, jamoadoshlarimga, do‘stlarimizga va oilamizga o‘tgan o‘n yil uchun katta rahmat. Har bir hikoyaning yakuni bor, ammo bu bob — eng yaxshisi bo‘ldi. Keling, bu so‘nggi lahzalarni birga o‘tkazaylik. Cheksiz muhabbat bilan», – deya post qoldirdi belgiyalik.

Ma’lumot uchun, futbolchi «shaharliklar» safidagi 10 yillik faoliyati davomida jami 413 ta o‘yin o‘tkazib, 106 bor raqiblari darvozasini ishg‘ol qildi va 174 bora jamoadoshlari goliga hammualliflik bo‘ldi. Shuningdek, belgiyalik ushbu vaqt ichida jamoasi bilan 18 ta kubok yutdi.